У беларускай сталіцы сабралася міжнародная каманда тэлепрафесіяналаў, якія кантралююць падрыхтоўку песеннага конкурсу. У складзе групы - эксперты з Вялікабрытаніі, Германіі, Мальты, Нідэрландаў, Італіі, Грузіі, Расіі, а таксама выканаўчы дырэктар "Еўрабачання". Падрабязнасці падрыхтоўкі маштабнага музычнага праекта - эксклюзіў - у рэпартажы Іны Пілевіч.
Хоць да дзіцячага "Еўрабачання" застаецца 9 месяцаў, яны ўжо ведаюць, якім будзе XVI Міжнародны песенны конкурс. У Мінску сабраліся тыя, хто ствараюць рэйтынгавае музычнае шоу. Абмеркавалі працу па падрыхтоўцы канцэпцыі конкурсу, уключаючы працягласць, крэатыўныя элементы, вядучых, сацыяльную праграму. Наглядальны савет "Еўрабачання" дае высокую ацэнку прэзентацыі Белтэлерадыёкампаніі. Праўда, шматлікія, нават зацверджаныя факты, яшчэ надоўга застануцца ў папках тэлеэкспертаў. Трымаюць інтрыгу.
Ён Ола Санд - выканаўчы дырэктар конкурсаў "Еўрабачанне":
"Праз некалькі тыдняў мы пачнём анансаваць мноства навін, звязаных з дзіцячым "Еўрабачаннем". Яны будуць звязаныя з графікай, упакоўкай шоу, лога і слоганам. Таксама неўзабаве назавём дакладную дату правядзення конкурсу".
Сёння ў гэтых сценах яны абмяркоўваюць канцэпцыю дзіцячага "Еўрабачання", а ўжо ў лістападзе тут размесціцца еўраклуб. "Прэзідэнт-Гатэль" стане другім домам для ўдзельнікаў конкурсу. Менавіта тут спыняцца дэлегацыі краін-удзельніц.
Асноўная частка каманды шоу будзе складацца з супрацоўнікаў Белтэлерадыёкампаніі. На такія ключавыя пасады як крэатыўны дырэктар, мастак па святле, рэжысёр трансляцыі магчыма прыцягненне замежных спецыялістаў. Прыцягнуць і валанцёраў. 6 дзясяткаў шчасліўчыкаў вызначаць па выніках конкурсу.
У праграме знаходжання наглядальнага савета - наведванне выставачнага комплексу "БелЭкспа". У гэтым павільёне плошчай тры тысячы квадратных метраў запланаваная цырымонія адкрыцця дзіцячага "Еўрабачання-2018". Яе прамую трансляцыю будуць весці тэлеканалы "Беларусь 1" і "Беларусь 24".
Дэфіле юных выканаўцаў у фармаце HD. Яго змогуць убачыць не толькі беларусы, але і гледачы з краін - удзельніц Еўрапейскага Вяшчальнага Саюза.
Далей у маршруце еўравізійнай дэлегацыі - інспекцыя ў "Мінск-Арэну". Гэтая пляцоўка ўжо прымала конкурс у 2010. Адгэтуль жа плануецца весці трансляцыю і цяперашняга шоу. Тэлепрафесіяналаў правялі па кулуарах, а таксама паказалі, як лядовую пляцоўку можна абсталяваць пад глядзельную залу. Гэтым вечарам тут дае канцэрт "Дэпеш Мод".
Наступная сустрэча наглядальнага савета запланаваная на чэрвень у Жэневе. У графіку ж супервайзера “Еўрабачання” серыя візітаў у Мінск. Ён Ола Санд ізноў прыляціць у Беларусь ужо вясной.
