Яму 11 гадоў, песню Спявай са мной напісаў сам і з ёй, здаецца, адгадаў. Дагадзіў і гледачам, і журы, якія пасля першых месцаў Аляксея Жыгалковіча і Ксеніі Сітнік канчаткова адмовіліся ад прынцыпу чым бы дзіцё не цешылася. Менавіта тут - у конкурсе дзіцячым - Беларусь ужо даўно ў фаварытах, адсюль і ўзровень нацыянальнага адбору: не быць занадта дарослым, не быць занадта дзіцячым, і не быць толькі дзеля ўдзелу.
Наш карэспандэнт Ніна Мажэйка сустрэлася з юным артыстам і ўпэўнілася, у яго ёсць не толькі талент, але і надзейны тыл.
Падрыхтоўка да конкурсу пачалася задоўга да шоу. Ужо ў сакавіку будучыя ўдзельнікі нацыянальнага адборачнага тура рэпеціравалі. Згодна з умовамі, пазмагацца за права прадставіць краіну на песенным спаборніцтве міжнароднага ўзроўню можа выканавец ва ўзросце ад 10 да 15 гадоў. Песня павінна быць на рускай або беларускай мовах. І ніякай фанаграмы. Толькі жывое выкананне. Да 10 чэрвеня ў прыёмную камісію Белтэлерадыёкампаніі прыйшло паўсотні бандэроляў. Дарэчы, 4 заяўкі былі нават з Расіі.
Людміла Барадзіна, выканаўчы прадзюсар тэлеканала Беларусь 2, кіраўнік рабочай групы нацыянальнага адборачнага тура: Песні добрыя і дзеці добрыя. Але прамы эфір - жывое выкананне, неверагоднае хваляванне. Не кожны можа з гэтым справіцца.
Толькі дзесяць засталося ў выніку адсеву журы. Сёлета асаблівую актыўнасць праявіла Мінская вобласць. Фіналістаў з гэтага рэгіёну больш за ўсё. Усе - эстраднікі. Акрамя спецыялізаваных музычных школ займаюцца і ў вакальных студыях. Дарэчы, ансамблі і дуэты сёння не ў модзе. Усе намінанты на перамогу - выключна сольныя выканаўцы.
Кожны з фіналістаў не толькі спявае і танцуе, але і выступае як аўтар або суаўтар песні. Ад рэтра-вечарынкі А-ля 60-ыя да святлодыёдных танцаў. Сёлета як на падбор дзеці здзіўлялі сцэнічнымі вырашэннямі. Два дні на Макаёнка, 9 у рэжыме нон-стоп ішлі рэпетыцыі перад фіналам. Не спыняліся нават у дзень ікс. Усяго толькі за гадзіну да выхаду на сцэну ўдзельнікі змаглі перавесці дух і паправіць макіяж.
Узровень падрыхтоўкі ўдзельнікаў настолькі моцны, што вызначыць відавочнага лідара не мог ніхто. Нават прафесіяналы.
Асаблівая ўвага каманда Белтэлерадыёкампаніі надала якаснай карцінцы. Гэта і зразумела. Конкурс тэлевізійны. Іскрынкай гэтага года стаў экран высокай дакладнасці.
Канстанцін Карніенка, аператар-пастаноўшчык Белтэлерадыёкампаніі: Сёлета мы пайшлі па шляху мінімалізму. Гэта значыць, на сцэне будзе мінімум дэкарацый, і з дапамогай асвятлення будзем ствараць нейкі вобраз кожнай песні. Гэты вобраз светлавы будзе падтрымлівацца на экране. Сёння ў гэтага экрана прэм'ера, таму што гэта адзіны ў Беларусі экран з такой высокай дакладнасцю.
У пятніцу ўвечар у студыі 600 было сапраўды горача. Не толькі ад сафітаў. Пакуль балельшчыкі скандзіравалі крычалкі, бацькі і настаўнікі пілі валяр'янку. Здавалася, не хвалююцца толькі самі канкурсанты.
Лёс канкурсантаў вырашалі не толькі члены журы, але і тэлегледачы. Сапраўднае выпрабаванне для тэлефоннага камутатара. Адзнакі публікі і прафесіяналаў сумаваліся і дзяліліся на два.
Арганізатары, Еўрапейскі вяшчальны саюз, прызнаюцца, што хочуць перайсці на новы ўзровень - зрабіць конкурс больш цінэйджарскім. У катэгорыю цін паводле ўмовў форуму трапляюць выканаўцы ад 13 да 15 гадоў. У першую чаргу, каб канкурсанты не парадзіравалі дарослых.
Так, Волкаў насуперак стэрэатыпам абышоў Зайцаву Ганну. Нашаму дэлегату - 11. Але за яго плечамі нямала. Вучыцца ў гімназіі-каледжы пры кансерваторыі. Займаецца спартыўна-бальнымі танцамі. Еўравізійны вопыт таксама ёсць. Летась Ілья танцаваў у нумары Ягора Жэшкі А мора, мора…. І праз год хлопчык дэбютуе як самастойны вакаліст. Парадкавы нумар - 8, які дастаўся па жэрабі, аказаўся шчаслівым.
Ілья Волкаў, пераможца нацыянальнага адборачнага тура Песня для Еўрабачання - 2013: Адчуваю радасць. Гэта наогул нельга растлумачыць словамі. Тое, пра што я марыў, менавіта тут і адбываецца.
Праз некалькі гадзін пасля абвяшчэння вынікаў наша здымачная група наляцела ў госці да трыумфатара. З вялікай групай падтрымкі. Зараз іх аб'ядноўвае не толькі студыя танцаў, у якой разам займаюцца, але і агульная мэта - перамагчы на Еўрабачанні. А наперадзе яшчэ два месяцы ўпартых трэніровак. Перад вырашальным рыўком ёсць зусім трохі часу, каб перавесці дух і адзначыць перамогу годна - дзіцячым шампанскім і цукеркамі.
Наталля Волкава, маці пераможца нацыянальнага адборачнага конкурсу Песня для Еўрабачання - 2013: Мы вельмі доўга рыхтаваліся да гэтага конкурсу. Паўгода. Мы адразу зрабілі гэты выдатны нумар - яшчэ ў сакавіку. Ілля настолькі сцэнічны, ён настолькі артыст па прыродзе, ён так марыў пра гэта. І гэта спраўдзілася. Ён быў упэўнены ў сабе.
Хіт нацыянальнага адборачнага тура Спявай са мной Ілья напісаў самастойна. Усяго за два тыдні.
Ілья Волкаў, пераможца нацыянальнага адборачнага конкурсу Песня для Еўрабачання - 2013: Пісалася, ну як разумееце, першы раз трохі складана і трохі лёгка. Таму што і сваё нешта дадаеш, табе дапамагаюць нешта і, звязваўшы ўсё, гэтыя думкі выводзіш на нотны лісток. Вось і ўсё ажыццявілася.
З нумарам дапамаглі прафесіяналы. Кожны рух адпрацоўваўся да дробязяў. Сучасны стыль - гэта не бальныя танцы. Але Ільі не прыйшлося доўга прывыкаць да эстраднага вобраза.
Ганна Саковіч, кіраўнік дзіцячай вакальна-харэаграфічнай студыі: Я думаю, што ён застанецца такім жа, толькі мы яго дапрацуем. Нумар у нас выдатны, вясёлы, завадны.
Важнай дэталлю нумара з'яўляюцца касцюмы. Дарэчы, яны таксама частка аўтарскай задумкі. Вольны еўрапейскі стыль - кэжуал павінен спадабацца кіяўлянам.
У адрозненне ад дарослага Еўрабачання краіна-пераможца на дзіцячым не атрымлівае аўтаматычнага права на правядзенне шоу ў наступным годзе. Так, Украіна двойчы прымала дэлегатаў. Упершыню - у 2009, калі перамогу заваявалі Нідэрланды. Другі раз у гісторыі дзіцячага конкурсу песні Еўрабачанне фінал будзе праходзіць у краіне-пераможцы мінулага года. І зноў у Кіеве.
Адборачныя туры прайшлі і ў іншых краінах-удзельніцах. Ужо вядома, хто складзе канкурэнцыю Ілью Волкаву на дзіцячым конкурсе песні. І хоць у Кіеў хлопчык паедзе не першы раз, паездка будзе далёкая ад экскурсійнай.
