Праз два гады чакання зноў пачынаем шамацець квіткамі. XXVII "Лістапад" насуперак сумным прагнозам усё ж адбудзецца. Сотню стужак ад фестывалю фестываляў пачнуць круціць заўтра адразу на пяці экранах Мінска.
Афіша на найбліжэйшы тыдзень - у праекце "Праменад".
Лістападная "завіруха" пачынаецца тут, на ўваходзе ў кінатэатр "Масква". На гэта месца з Палаца Рэспублікі цырымонію адкрыцця «здзьмула лістападаўскім ветрам» у 2014. Заўтра дырэкцыя зробіць «ход канём» у адноснай ізаляцыі.
Замест тысячы кіназала прыме толькі чатыры сотні гасцей на "Каралеўскую гульню".
Нямецка-аўстрыйская стужка - адна з 13 прэтэндэнтаў на званне лепшага ігравога кіно. Свежае сінема (максімум год з дня стварэння) трапіла ў шорт-ліст з 20 краін свету. З Расіі ўсяго адна карціна. Асноўнае з Захаду і Аравійскага паўвострава.
У адрозненні ад конкурсу ігравога кіно, дзе беларускіх карцін нуль, наша "Страла" ад Галіны Адамовіч пранізала выніковы конкурсны ліст з дакументалак.
Усяго прапануюць 17 рэальных гісторый пра чалавека і навакольныя абставіны. Многія фільмы ўжо з арсеналам прызоў, прызнаныя буйнымі кінафестывалямі.
Дакументальныя стужкі будуць круціць у "Цэнтральным" і "Піянеры".
Дарэчы, кінаюбіляр (сёлета яму 55) прыме і пясочніцу "Лістапада". Тут, дарэчы, і стартуе агульны марафон кінапаказаў. Пачнуць лічыць "Зоркі сёмага неба" ў рамках адкрыцця "Лістападзіка".
Выбралі прэм'еру - першы беларускі мюзікл, які яшчэ ў пошуку ўзнагарод.
Наша анімацыя не застанецца незаўважанай: 3 мультфільмы беларускай вытворчасці з 14 кандыдатаў.
Пакажуць і прызнанае: тую ж лялечную стужку "Нават мышы трапляюць у рай". Гэта найлепшае анімацыйнае кіно паводле версіі Шанхайскага кінафестывалю.
Гэтым разам без нацыянальнага конкурсу, але з эксперыментальным кіно маладых з прапіскай з Нігерыі, Кубы, Азербайджана і нават Аўстраліі. Самая насычаная і вялікая конкурсная афіша - 23 стужкі. Разважанні - выклік. Многае на мяжы фантастыкі. Як паляцець у космас літаральна з кватэры, што прыносіць амулет джуджу.
Дарэчы, кожны фільм паказваюць толькі адзін раз. Паўтораў у афішы не знайсці. Большасць сеансаў у "Беларусі". "Лістападных" касет тут больш за 4 дзясяткі.
Стужкі з пазнакай "у конкурсе" падабаюцца не ўсім. Таму яшчэ тры дзясяткі фільмаў сабралі для больш масавых паказаў. Ёсць нават даваеннае кіно - "Песня аб сяброўстве" 1941 года, нашумелыя "Урокі фарсі" (без пяці хвілін прэтэндэнт на "Оскар") і нават залатая калекцыя Віктара Турава. Шмат кіно прадставяць самі творчыя каманды.
"Лістапад" упершыню ахопіць Дом афіцэраў і нават галерэю Савіцкага. Кіно ў арт-масы. Праз тыдзень тут размесцяць карцінныя кадры Мінска 60-х. Фільм-настальгія "Мінская элегія" - рэдкі госць экранаў. Ажыццявіць кіназабег можна за даступныя сумы - ад 4 да 7 рублёў за сеанс. Уся ўвага на экраны. Апошняя магчымасць апынуцца ў эпіцэнтры "Лістапада".
