Каб сфарміраваць поўную карціну мінскага саміту, каманда "Галоўнага эфіру" пабывала ў сталіцах "нармандскай чацвёркі". Пачынаем з Масквы. За ходам перамоў і вынікамі там сачыў наш спецыяльны карэспандэнт Максім Кароткін.
Расійская аналітычная думка мінскія дамоўленасці ўспрыняла некалькі неадназначна. З аднаго боку тут, вядома, вітаюць рашэнне аб спыненні агню. З другога - скептычна ставяцца да магчымасці хутка вырашыць прынцыповыя пытанні. У Маскве лічаць, што занадта глыбокія супярэчнасці паміж бакамі ўкраінскага канфлікту, каб чакаць хуткага яго вырашэння.
Мінская сустрэча - безумоўны трэнд аналітычнага абмеркавання апошніх дзён. Вынікі саміту ў беларускай сталіцы абмяркоўваюць на канферэнцыях, у эфірах і на круглых сталах. Галоўны лейтматыў абмеркаванняў - зроблена ўсё магчымае. Але паўнавартаснае вырашэнне канфлікту - занадта далёкая перспектыва.
Прычын для скепсісу знаходзіцца даволі шмат. Гэта і расплывістасць кампрамісных фармулёвак падпісанага бакамі дакумента. Гэта і адсутнасць на перамовах аднаго з важных сусветных гульцоў - ЗША. І наяўнасць у складзе канфліктуючых бакоў так званых непрымірымых прыхільнікаў вайны. І ўнутрапалітычнае становішча ва Украіне.
Разам з тым экспертная супольнасць Расіі адназначна ацэньвае ролю і месца афіцыйнага Мінска ў дасягненні дамоўленасцяў. У гэтых адносінах Беларусі адводзіцца выключна станоўчая роля глабальнага міратворца.
Першыя вынікі дасягнутых у Мінску дамоўленасцяў таксама аптымістычныя. Расійскія СМІ гавораць аб наступленні цішыні на ўсходзе Украіны. І ў Маскве мацнее надзея на выкананне бакамі канфлікту і астатніх пунктаў пагаднення.
Як гаворыць руская прымаўка - хоць не пышна, абы зацішна.
