У сталіцы Расіі ўпершыню праходзіць арт-фестываль "Міколін дзень"

17-метровы карабель 11-га стагоддзя, гіганцкія рыбы і медузы, школа яхтынгу і "Ветразь надзеі". Гэтымі днямі цэнтр Масквы ператварыўся ў сапраўдную марскую прыстань. У сталіцы Расіі ўпершыню праходзіць арт-фестываль "Міколін дзень". Каго ахоўвае святы Мікалай? Якія дары прывёз “Ветразь надзеі"? І якое меню прыгатавалі рыбныя рэгіёны Расіі? У марскім падарожжы пабывала Дар'я Белавусава-Пятроўская.

На некалькі дзён Масква ператварылася ў шумны марскі кірмаш. Гараджане падхарашыліся ў сіне-блакітныя папяровыя пілоткі, а вясёлыя музыканты "вынеслі" на бераг белыя караблікі і разнастайныя віды рыб.

Фестываль у гонар Святога Мікалая ў Расіі праводзяць упершыню. Па словах арганізатараў, у будучыні ён можа стаць адным з самых папулярных святаў, які аб'ядноўвае царкоўныя і свецкія традыцыі. Бо ў праваслаўных хрысціян гэты святы асабліва ўшанаваны. Ён ахоўвае мараплаўцаў, дапамагае хворым і абараняе дзяцей. 

Таму галоўны пасыл фестывалю - гэта добрыя справы, падарожжы і творчасць. Прама ў цэнтры сталіцы прышвартавалася венецыянскае гандлёвае судна XI стагоддзя "Карабель дароў". Любы ахвочы можа перадаць юнгам паштоўку з пажаданнямі і тут жа атрымаць пасланне ў адказ ад незнаёмых людзей.

І вядома, святы Мікалай сытна накорміць усіх аматараў марскіх далікатэсаў. Бургеры са шчупака, крэветкі на грылі, запечаныя сібас і дарада, сёмга пад лагодным соусам. Рыбнае меню не толькі смачнае, але і вельмі карыснае.

Фестываль у гонар святога Мікалая - гэта яшчэ і захапляльнае падарожжа для юных маракоў. Можна ўстроіць паляванне на разнаколерных рыбак, хай і не ядомых. Паказаць цуд эквілібрыстыкі прама на палубе карабля. Навучыцца плесці марскія вузлы. А галоўнае - дарыць усмешкі і добры настрой адно аднаму і навакольным.