Пачнем з апошняй інфармацыі аб Фларыдзе, дзе развязалася самая сапраўдная крывавая бойня. Незадоўга да заканчэння заняткаў у адной са школ штата была адкрытая страляніна з паўаўтаматычнай вінтоўкі. Не меней за 17 чалавек загінулі. Параненых звыш 10. У запасе ў стралка былі і дадатковыя магазіны, і дымавыя шашкі. Прэзідэнт ЗША Дональд Трамп у "Твітэры" выказаў спачуванні ахвярам і родным пацярпелых. Уся храналогія трагічных падзей - у Аляксандры Пінчук.
У горадзе Паркленд на поўдні штата Фларыда адбылася страляніна ў сярэдняй школе “Стоўнмэн Дуглас”. Падлетак, які расстраляў вучняў, меў пры сабе цэлы арсенал, у тым ліку дымавыя шашкі, і дбайна спланаваў напад. 19-гадовы Нікалас Круз прывёў у дзеянне пажарную сігналізацыю ў навучальнай установе. Гэта выклікала паніку. Затым адкрыў страляніну па людзях, якія беглі. Вось што атрымалася зняць аднаму з вучняў. Гэта як раз і ёсць момант атакі.
Макс Чарльз, вучань сярэдняй школы “Стоўнмэн Дуглас”: "Я быў у класе. І ўсё, што я чуў, гэта былі стрэлы. Потым паліцэйскія сказалі, што можна выходзіць на вуліцу. Па шляху я бачыў целы настаўніка і 4 вучняў".
Мануэль Бараца, вучань сярэдняй школы "Стоўнмэн Дуглас": "Стралок прывёў у дзеянне пажарную сігналізацыю. Мы выйшлі з класа. Пах, пах, пах. Я чуў стрэлы. Спачатку падумаў, што феерверк. Але хутка зразумеў, што страляюць. Пабег назад у класны пакой. У гэты момант наш настаўнік атрымаў смс. Ён даведаўся, што ў школу патрапіў стралок, і распавёў нам".
У школе вучацца каля 3 000 чалавек. Усе яны былі эвакуіраваныя.
Злачынца - а гэта, як аказалася, былы вучань школы - быў арыштаваны праз дзве гадзіны пасля страляніны недалёка ад будынка школы. Яго выключылі з гэтай навучальнай установы за тое, што ён прыносіў з сабою зброю і неаднаразова парушаў дысцыпліну. Зараз медыкі змагаюцца за жыццё тых, хто апынуўся ў цэнтры падзей.
Эван Бояр, кіраўнік дэпартамента экстраннай медыцыны: "Мне вядома пра 17 пацярпелых, якія паступілі ў аддзяленне хуткай дапамогі. Наша бальніца прыняла 8 пацыентаў. Да нас патрапіў і падазроны. Яму аказалі першую медыцынскую дапамогу, а потым ён быў накіраваны пад вартай у паліцэйскі ўчастак. На жаль, двух пацыентаў выратаваць нам не атрымалася. Трое ў крытычным стане. Стан яшчэ трох я магу апісаць як стабільны".
Страляніна ў школе Паркленда чарговы раз абвастрыла дэбаты аб небяспецы захавання ў сіле закона аб вольным продажы зброі ў Злучаных Штатах Амерыкі.
Біл Нэльсан, сенатар ад штата Фларыда: "Гэта чорны дзень як для Фларыды, так і для ЗША. Трагічныя масавыя забойствы ў краіне штораз выклікаюць адназначную рэакцыю. Мы ўсе згодныя з тым, што з гэтым трэба пакончыць. А потым у школах зноў страляюць. Упэўнены, што нам неабходна змяняць заканадаўства. Нельга, каб зброю мог без праблем купіць амаль хто заўгодна".
Як мінімум у дзевяці штатах законы дазваляюць настаўнікам старэйшых класаў насіць з сабою асабістую зброю. Першыя спробы ўзброіць амерыканскіх настаўнікаў і супрацоўнікаў школ былі распачатыя ў 2012 годзе пасля страляніны ў школе “Сэндзі-Хук” у Канектыкуце. Яе ахвярамі сталі 20 дзяцей і 6 настаўнікаў. У кожным штаце ЗША асобныя групы валанцёраў змагаюцца з Нацыянальнай стралковай асацыяцыяй на ўзроўні судоў, каб перашкодзіць праходжанню законаў, якія дазваляюць прыносіць зброю ў школу.
