Спачуванні выказваюць лідары шматлікіх краін. Узрушаны тым, што здарылася, у АБСЕ і Парламенцкай асамблеі Савета Еўропы. У Савеце Бяспекі ААН выбух асудзілі і заклікалі знайсці арганізатараў. У Санкт-Пецярбургу аб’яўлена трохдзённая жалоба. Жыхары і госці горада нясуць кветкі да станцыі "Сянная плошча", запальваюць свечкі. Выказваюць словы спагады і падтрымкі людзі і ў іншых краінах.
Беларусы нясуць кветкі да пасольства Расійскай Федэрацыі ў Мінску. У памяць аб загінуўшых гараць свечкі і ляжаць вянкі. У знак смутку ля будынка дыппрадстаўніцтва прыспушчаны дзяржаўны флаг Расіі.
Паводле апошніх звестак, выбух у метро забраў 11 жыццяў. 51 чалавек, па інфармацыі МНС, - у бальніцах. Беларусу, які атрымаў раненні ў выніку тэракта, ужо зрабілі аперацыю. Пагрозы жыцця няма, ён у стане сярэдняга цяжару. СМІ паведамляюць, што выбух у вагоне пецярбургскага метро, імаверна, учыніў тэрарыст-смяротнік. Ён пакінуў бомбу на платформе "Плошча Паўстання", а потым падарваў сябе ў вагоне. Прыстасаванне было зафіксавана ў яго на целе, знаходзілася ў рукзаку альбо ён трымаў бомбу ў руках. Другое прыстасаванне атрымалася абясшкодзіць да таго, як яно спрацавала. Праўда, некаторыя крыніцы не выключаюць наяўнасці саўдзельніка. Гарантаванне бяспекі ў Санкт-Пецярбургу пасля выбуху ўзята пад узмоцнены кантроль. Сёння раніцай з-за безгаспадарнага прадмета закрываліся дзве станцыі метро. Павышаная ўвага - да месцаў зборышча людзей. У аэрапорце Пулкава ўзмоцнены меры бяспекі.
