Ва ўсім свеце абмяркоўваюць рэакцыю амерыканскіх грамадзян на заяву прэзідэнта наконт абмежавання абароту зброі. Прамову ўспрынялі неадназначна. Сярод насельніцтва гэта выклікала рэзкае павелічэнне попыту на небяспечны тавар. А рэспубліканцы і зусім паабяцалі падаць у суд на Абаму за спробу абмежаваць свабоду амерыканцаў. Гаворачы аб прычынах кардынальнага рашэння, амерыканскі лідар быў вельмі эмацыйны і нават не змог утрымаць слёз, успамінаючы аб загінуўшых у выніку масавых забойстваў. Больш падрабязна Вольга Давідовіч.
Усходняя зала Белага дома. Барак Абама выходзіць да прэсы, каб паведаміць, што не будзе чакаць, пакуль у краіне здарыцца новы масавы расстрэл. І ўжо сёння ўводзіць абмежаванні на продаж агнястрэльнай зброі. Пры гэтым ён вымушаны выкарыстаць свае прэзідэнцкія паўнамоцтвы і дзейнічаць у абыход Кангрэса. Рэспубліканская большасць пад націскам уплывовага зброевага лобі з Абамам не згодная.
Барак Абама, прэзідэнт ЗША: "Мы адзіная развітая краіна на планеце, у якой масавыя забойствы адбываюцца рэгулярна. Ні ў адной іншай краіне гэтага няма нават блізка. Але замест таго, каб думаць аб тым, як вырашыць праблему, яна ператварылася ў адну з самых вострых палітычных спрэчак".
Асноўнае: зброяй забароняць гандляваць праз Інтэрнэт або на папулярных у Штатах тэматычных выставах. Бо кожны прадавец зараз абавязаны праверыць біяграфію любога пакупніка: ці здаровы псіхічна, ці не здзяйсняў злачынстваў, ці не заўважаны ў хатнім гвалце. Дадатковыя паўнамоцтвы атрымае таксама ФБР - дзве сотні новых спецыялістаў будуць сачыць за тым, каб зброя не трапіла не ў тыя рукі. Аб усім гэтым Абама гаварыў у асяроддзі людзей, родныя і блізкія якіх загінулі ад куль на вуліцах амерыканскіх гарадоў. Прэзідэнт ЗША не змог стрымаць слёз.
Барак Абама, прэзідэнт ЗША: "Ніводная сям'я ўявіць не можа, каб жыццё кагосьці з блізкіх было абарвана куляй. Штораз я прыходжу ў лютасць, калі думаю аб забітых дзецях".
Паводле інфармацыі Белага дома, штогод больш як 30 тысяч чалавек гінуць у ЗША ад агнястрэльных раненняў, а за апошнія 10 гадоў - больш як 20 тысяч дзяцей малодшыя за 18 гадоў. Але ні жахлівая статыстыка, ні слёзы Абамы разжаліць амерыканцаў не ў стане. Другую папраўку да Канстытуцыі - менавіта яна ўскосна дазваляе валодаць, а часам і карыстацца агнястрэльнай зброяй - жыхары ЗША лічаць ці ледзь не найважнейшым дасягненнем дэмакратыі.
Навіна аб тым, што Прэзідэнт абвесціць аб абмежаваннях, Белы дом распаўсюдзіў загадзя, і амерыканцы літаральна кінуліся ў магазіны, каб купіць зброю па старых правілах.
Абарот продажаў у ЗША вялізны: баявыя пісталеты, аўтаматы і драбавікі знаходзяцца, фактычна, у свабодным доступе. Амаль палова амерыканскіх сямей захоўвае ў сваім сейфе адну або некалькі вінтовак. Чаму зброя дагэтуль дазволена ў адной з самых буйных і магутных дэмакратычных краін свету - гэтым пытаннем задаюцца многія. Можна пярэчыць: хто жадае забіць, знойдзе і іншыя сродкі - законныя або пазапраўныя. Але лёгкі доступ да зброі значна спрашчае фатальную задачу. Зрэшты, 15 апошніх масавых расстрэлаў у ЗША былі здзейсненыя са зброі, набытай цалкам легальна, пакупніка якой дбайна правяралі. Так што на справе ўказ Абамы ці наўрад зможа спыніць гвалт.
