У мінулую нядзелю ён пранёсся над тэрыторыямі адразу некалькіх краін і забраў жыцці 8 чалавек. Стыхія зносіла дахі з дамоў і вырывала з коранем дрэвы. Сотні дамоў засталіся без святла, аўтамабільны і чыгуначны рух паралізаваны, а некаторыя аэрапорты закрытыя. Вецер ужо некалькі саслабелага "Герварта" сёння накрыў і Беларусь. Хуткасць парываў дасягае 24 метраў за секунду, дождж. У панядзелак і аўторак аб’яўлены аранжавы ўзровень небяспекі. Як паведамілі ў МНС і Белэнерга, на дадзены момант сур'ёзных наступстваў вецер не прынёс, адключэнняў электраэнергіі таксама не зафіксавана. Затое ў найбольш пацярпелых ад урагану краінах - Германіі, Польшчы і Чэхіі - усе сілы кінутыя на ліквідацыю наступстваў стыхіі.
З падрабязнасцямі Вольга Давідовіч. Чатыры чалавекі сталі ахвярамі разгулу стыхіі ў Германіі - на федэральных землях Ніжняя Саксонія і ў Паўночнай Рэйн-Вестфаліі. На поўначы Польшчы вадзіцель аўтамабіля загінуў, урэзаўшыся ў дрэва, якое ўпала на дарогу перад капотам аўтамабіля. А на захадзе краіны яшчэ адзін вадзіцель загінуў пад дрэвам, што ўпала на яго машыну.
Не абышлося без ахвяр у Чэхіі. У выніку падзення дрэў там загінулі мужчына і жанчына. Вецер быў такой сілы, што зносіў нават дахі з дамоў. У краіне часткова прыпынены чыгуначныя зносіны. Абясточаны з-за ўрагану звыш 120 тысяч домаўласніцтваў у васьмі краях рэспублікі.
На метэастанцыі ў ліберэцкім аэрапорце зарэгістравалі віхор, сіла якога дасягала больш за 102 кіламетры за гадзіну.
Сур'ёзнае здарэнне адбылося ў Зальцбургу. Там у момант моцнага ветру экстрэмальна садзіўся самалёт польскай авіякампаніі Enter Air. Машына ледзь не разбілася. Няпростую пасадку ўбачыў выпадковы фатограф. Людзі, якія знаходзіліся на борце, дзяліліся, што перажылі сапраўдны жах.
Нядзіўна. Месцамі парывы ветру дасягалі 50 метраў за секунду. Пілоты на другую спробу не адважыліся. Самалёт накіраваўся ў Франкфурт. А там таксама з-за моцнага ветру не мог сесці самалёт з Х'юстана. У Берліне быў уведзены рэжым надзвычайнай сітуацыі, спынены рух цягнікоў, давялося закрыць дзясяткі аўтамабільных трас. Усяго нямецкая чыгунка адмяніла рух міжгародніх саставаў у сямі федэральных землях.
Reuters паведамляе, што на адзін з нямецкіх астравоў напярэдадні выкінула 225-метровы грузавы карабель Glory Amsterdam. На яго борце - амаль дзве тысячы тон дызельнага паліва. Спецыялісты праводзяць праверку на прадмет магчымай уцечкі гаручага.
Затоплены цэнтр Гамбурга. Эльба выйшла з берагоў.
"Герварт" прынёс штармавое надвор'е і на Балтыйскае мора, там вышыня хваль перавысіла 5 метраў, а парывы ветру дасягалі 25 метраў за секунду.
На захадзе Украіны ўсё таксама пачалося з ліўняў, якія суправаджаліся моцным ветрам, а затым 15-сантыметровым слоем снегу засыпала Карпаты. У Прыкарпацці быў шпіталізаваны хлопчык - на яго ўпала дрэва, якое надламалася. Толькі ў Львоўскай вобласці без святла засталіся 129 населеных пунктаў.
У літаральным сэнсе заваліла снегам Румынію. Месцамі таўшчыня снежнага покрыва перавышае 20 сантыметраў. Мясцовыя трасы заблакіраваны. Уведзены жоўты код небяспекі.
З перабоямі ў працы грамадскага транспарту сутыкнуліся жыхары Калінінграда. Там за суткі выпала траціна месячнай нормы ападкаў. Дажджы выклікалі падтапленнні. Вуліцы ператварыліся ў рэкі. Усе гарадскія службы, задзейнічаныя ў ліквідацыі наступстваў стыхіі, працуюць ва ўзмоцненым рэжыме. Да вечара ў Калінінградзе чакаюць узмацнення паўночна-заходняга ветру. Сіноптыкі прагназуюць праліўныя дажджы. Адразу ў некалькіх рэгіёнах Цэнтральнай Расіі аб’яўлена штармавое папярэджанне.
