У Германіі - другі дзень саміту "Вялікай сямёркі". Асноўная тэма сёння - барацьба з міжнародным тэрарызмам. Пытанне, якое афіцыйна на парадку дня не заяўлена, але яго ўсё роўна абмяркоўваюць - украінскі крызіс і на яго фоне адносіны з Масквой. Пра гэта, у прыватнасці, доўга гутарылі на двухбаковай сустрэчы Ангела Меркель і Барак Абама. Гаварылі ўдзельнікі саміту і аб Грэцыі, якая павінна прадставіць новы план рэформ у абмен на працяг фінансавай дапамогі. Але перамовы па гэтым пытанні пакуль на месцы. Цяперашні саміт, як і ўсе папярэднія, не абышоўся без пратэстных акцый. Антыглабалісты і іншыя незадаволеныя палітыкай краін "Вялікай сямёркі" сабраліся ў суседнім Гарміш-Партэнкірхене. Яны накіраваліся маршам да месца правядзення саміту, але былі спынены паліцыяй. Падчас саміту лідары сямі эканомік свету абмяркуюць таксама пытанні, звязаныя з кліматычнымі змяненнямі і праблемамі бяспекі.
