За імгненне - да новых тэрактаў... Паліцыя Бруселя і вайскоўцы напярэдадні эвакуіравалі некалькі тысяч чалавек з будынкаў міжнароднага чыгуначнага вакзала і пракуратуры. У галоўнае паліцэйскае бюро паступіў ананімны званок. Небяспечныя раёны імгненна ачапілі, і сапёры працавалі да самай ночы. З-за пагрозы выбуху цягнікі курсіравалі амаль з гадзіннымі затрымкамі або ўвогуле не спыняліся ў Бруселі. Усе падрабязнасці - у нашага ўласнага карэспандэнта ў Бельгіі Аляксея Радзівонава.
Паўдзясятка патэнцыяльных атак тэрарыстаў - усяго за адзін дзень. Не паспелі паліцыя, вайскоўцы, ды і звычайныя жыхары Бельгіі акрыяць пасля пагроз у самой сталіцы, як бліжэй да вечара на небяспечныя ананімныя званкі адказалі і ў іншым буйным горадзе краіны - Шарлеруа.
Роўна ў 17:30 па мясцовым часе праваахоўнікам зноў паведамілі пра магчымыя бомбы на чыгуначным вакзале і ў будынку другога па велічыні аэрапорта Каралеўства. Паводле слоў ананіма, актываваць узрыўное прыстасаванне яны павінны былі роўна праз 15 хвілін. Патэнцыяльныя мішэні тэрарыстаў эвакуіравалі, у прамым сэнсе гэтага слова, за лічаныя імгненні. Разам з тым ачапілі і найбліжэйшыя прыпынкі метро і аўтобуса. Курсіраванне транспарту ў небяспечным раёне камуны, вядома, таксама прыпынілі на некалькі гадзін.
З-за экстраннай эвакуацыі аэрапорта Шарлеруа былі затрыманыя, як на адпраўленне, так і на прыбыццё, некалькі дзясяткаў самалётаў. Спынілі рух цягнікоў. Да пуцей нікога не падпускалі, пакуль працавалі сапёры. Вакол квартала быў створаны перыметр бяспекі. Дагэтуль у небяспечных раёнах дзяжураць паліцыя і вайскоўцы. У Бруселі ўладам напярэдадні паведамілі аб заложанай бомбе на паўночным чыгуначным вакзале і ў будынку пракуратуры. Акрамя гэтага, у камуне Скарбек, той самай, дзе пражываюць мігранты і дзе падчас рэйдаў паўгода назад знайшлі сховішча тэрарыстаў ІДІЛ, узброены нажом злачынец напаў на дваіх паліцэйскіх. Аднаго раніў у шыю, другога - у жывот і паспрабаваў схавацца. Патруль пачаў праследваць тэрарыста, той аказаў супраціўленне і раніў яшчэ аднаго паліцэйскага. Тады паліцыя адкрыла агонь. Таго, хто нападаў, затрымалі.
