Роўна 10 гадоў таму барысаўскі БАТЭ ўпершыню ў гісторыі выйшаў у групавы раунд футбольнай Лігі чэмпіёнаў. Паўтарыць гэты поспех сёлета складана, але магчыма. Што для гэтага патрэбна? Адказы ў рубрыцы “Матчбол”.
Пачнем з прыемнага: 20-гадовая мінчанка Арына Сабаленка стала пераможніцай прэстыжнага тэніснага турніру катэгорыі “Прэм'ер” у амерыканскім Нью-Хейвене. У фінале мінчанка разграміла іспанку Карлу Суарэс-Навара 6:1, 6:4.
75 хвілін спатрэбілася беларусцы, каб увайсці ў гісторыю айчыннага тэніса. Арына стала ўсяго трэцяй прадстаўніцай нашай краіны, хто перамагаў на прафесійным турніры ў жаночым адзіночным разрадзе.
Трыумф у Нью-Хейвене дазволіў беларусцы ўпершыню ў кар’еры ўвайсці ў топ-20 сусветнага рэйтынгу. З сёняшняга дня Арына дваццатая ракетка планеты. Ужо заўтра Арына Сабаленка стартуе на Адкрытым чэмпіянаце ЗША. Выступяць у Нью-Ёрку таксама Вікторыя Азаранка, Вера Лапко і Аляксандра Сасновіч.
Сталічнае хакейнае “Дынама” прайграе ў дзевяці матчах з дзесяці магчымых у перыяд перадсезоннай падрыхтоўкі. Напярэдадні бела-блакітныя саступілі “Лакаматыву” з Яраслаўля ў серыі булітаў 2:3.
Як вынік - на турніры ў Латвіі беларусы заваявалі толькі два балы і занялі апошняе месца сярод пяці каманд. Стан спраў непрыемны з улікам таго, што першы афіцыйны паядынак “зубры” правядуць ужо ў наступны панядзелак супраць “Ак Барса”. Усяго тыдзень застаецца ў Гордзі Дуаера, каб нешта змяніць. Пажадаем поспехаў канадскаму спецыялісту.
Пасля паражэння ў Лізе Еўропы ад “Зеніта” таксама няўпэўнена выступае і футбольнае мінскае “Дынама”. Пасля пройгрышу “Гарадзеі” напярэдадні ў Гомелі з мясцовым аднайменным клубам бела-блакітныя згулялі ўнічыю - 0:0.
Страчвае ачкі ў 18-ым туры чэмпіянату краіны і БАТЭ: дома каманда Аляксея Багі не здолела перамагчы “Віцебск” - 1:1.
А ў мінулы аўторак у першым паядынку раунда плэй-оф Лігі чэмпіёнаў БАТЭ дома саступіў ПСВ 2:3. Аляксандр Глеб у гэтым матчы забіў першы свой гол за апошнія тры гады, аднак нават гэтага не хапіла, каб згуляць унічыю.
Дарэчы, менавіта сёння споўнілася роўна 10 гадоў з моманту, калі БАТЭ ўпершыню выйшаў у групавы раунд Лігі чэмпіёнаў. Каб гэты вынік паўтарыць, у Нідэрландах ПСВ трэба забіваць мінімум 2 мячы. Калі не атрымаецца, барысаўчане выступяць у групе Лігі Еўропы.
На гэтым тыднi ўсе разам падтрымліваем БАТЭ: барысаўчане ў раўндзе плэй-оф Лігі чэмпіёнаў у гасцях згуляюць супраць ПСВ Эйндхавен. Матчы пройдуць у сераду, пятніцу і нядзелю. “Нёман” і “Юнацтва” таксама згуляюць у Лізе чэмпіёнаў (толькі хакейнай), а ў суботу стартуе новы - адзінаццаты - сезон КХЛ. Усё гэта на тэлеканалах Белтэлерадыёкампаніі.
