Я гатовы да ціску і псіхалагічнай нагрузкі. Новы галоўны трэнер зборнай Беларусі Ігар Крывушэнка адказваў на пытанні журналістаў у Доме футбола. Беларускі спецыяліст змяніў на гэтай пасадзе іншага ўраджэнца Мінска Аляксандра Хацкевіча. Шанцаў адабрацца на чэмпіянат свету - 2018 у Расіі ўжо няма, таму Крывушэнка ўжо можа рыхтаваць зборную да наступнага адборачнага цыкла.
Расказвае Павел Капуцкі: Аляксандра Хацкевіча звольнілі амаль тры месяцы назад, 6 снежня. Хто ж стане новым галоўным трэнерам? Вакол Дома футбола чутак было больш чым афіцыйнай інфармацыі. Сёння новы настаўнік галоўнай каманды краіны даў першую прэс-канферэнцыю ў нязвыклай пакуль ролі.
Крывушэнка спакойны, на пытанні адказвае ўпэўнена. Яшчэ ў канцы студзеня мы спыталі ў трэнера: не ці прапаноўвалі вам узначаліць зборную?
Ігар Мікалаевіч не без журботы ў вачах адказаў: "Не, да мяне з федэрацыі ніхто не звяртаўся".
Працу ў зборнай Крывушэнка будзе сумяшчаць з пасадай галоўнага трэнера "Тарпеда-БелАЗ". З аўтазаводцамі трэнер з 2012-га, а летась выйграў для Жодзіна Кубак Беларусі. У фінале абыграна былая каманда Ігара Мікалаевіча - БАТЭ. Таксама спецыяліст узначальваў мінскае "Дынама" і расійскую "Сібір", якую ў дэбютным сезоне вывеў у Прэм'ер-лігу.
Віктар Ганчарэнка заняты ў маскоўскім ЦСКА, Валерый Карпін працы ў зборнай Беларусі аддаў перавагу гадавому кантракту на тэлеканале "Матч ТБ". Аляксандр Барадзюк узначаліў "Казахстан". Леанід Кучук, Алег Конанаў, Мікалай Пісараў, Віктар Скрыпнік - ва ўсіх знайшліся свае прычыны адмовіцца ад прапановы Беларускай федэрацыі футбола.
У табліцы адборачнай групы да чэмпіянату свету зборная Беларусі на перадапошнім месцы. Ніжэй толькі Люксембург. Слабы вынік - галоўная, але не адзіная прычына адстаўкі мінулага трэнера. Кіраўніцтва федэрацыі адказнасць з Аляксандрам Хацкевічам не падзяліла і засталося.
Фармальна Крывушэнка з'яўляецца выконваючым абавязкі галоўнага трэнера. Менавіта фармальна. Яго зацвердзяць на выканкаме 22 сакавіка, а ўжо праз тры дні гасцявым матчам са шведамі спецыяліст дэбютуе ля руля нацыянальнай каманды.
Усяго ў адборачным цыкле беларусам засталося правесці шэсць матчаў. Самыя гучныя афішы ў кастрычніку: Нідэрланды і Францыя.
Дзверы ў зборную не зачыненыя ні для каго. Новы галоўны трэнер разлічвае і на маладых, і на ветэранаў. Крывушэнка скончыў РВАР з залатым медалём, а сачыненне ў выпускным класе напісаў у вершах. Нашу зборную ўзначаліў па-сапраўднаму таленавіты і разумны трэнер.
