Тройчы на тыдзень яны збіраюцца разам дзеля любімай справы. Офісныя касцюмы змяняюць на форму ў нацыянальных колерах, а рабочыя кабінеты - на лядовую пляцоўку. Людзей самых розных прафесій аб'ядноўвае адна гульня і адна каманда. Хакейная каманда Прэзідэнта.
Спартыўная дружына святкуе 20-гадовы юбілей. Сваю першую трэніроўку каманда правяла ў ліпені 1997 года. Сёння тых, хто ўнёс найбольшы ўклад у развіццё каманды, разам з сем'ямі запрасілі ў Палац Незалежнасці. Гасцям правялі экскурсію па залах, дзе абмяркоўваюцца важныя дзяржаўныя пытанні, праходзяць міжнародныя сустрэчы і знакавыя саміты. Да юбілею тут адкрылася імправізаваная фотаэкспазіцыя, прысвечаная гісторыі каманды. На гэтых кадрах самыя запамінальныя моманты лядовых баталій, гучныя перамогі і, вядома, спартыўныя эмоцыі. І хаця ўдзельнікі каманды на лёдзе бачацца часта, гэтая нефармальная сустрэча – выдатная нагода ўспомніць, з чаго ўсё пачыналася. Здымак на памяць зрабілі і сёння.
У гэтай камандзе плячо ў плячо на лёд выходзяць ветэраны і моладзь, былыя прафесіяналы і аматары, лідар краіны і радавыя грамадзяне. Іх усіх аб'ядноўваюць вернасць і адданасць любімай гульні, спартыўны азарт і воля да перамогі. Дзясяткі матчаў, сотні закінутых шайбаў, тысячы балельшчыкаў і моцныя пераможныя традыцыі. За 20 гадоў існавання каманда гучна зарэкамендавала сябе сярод сусветных аматараў гэтага віду спорту. Штогод галоўны старт для дружыны - Калядны турнір, у якім беларусы святкавалі перамогу 10 разоў.
