Усе хакейныя балельшчыкі ў Беларусі і свеце замерлі ў чаканні. Да старту чэмпіянату планеты ў Даніі застаецца 3 дні. Канчатковы склад нашай каманды на сусветны форум практычна сфарміраваны. У зборнай няма шматлікіх дасведчаных гульцоў - пакараць Капенгаген будуць маладыя зоркі беларускага хакея. Эксперты чакаюць, што гэты чэмпіянат свету будзе мацнейшы за алімпійскі турнір у Пхёнчхане. Бо ў Данію прыедуць хакеісты з НХЛ.
Аб тым, наколькі падрыхтаваная каманда Дэйва Льюіса, рэпартаж Крысціны Камыш. Нацыянальная зборная Беларусі па хакеі сабралася яшчэ ў канцы сакавіка. Каманда штодня трэніравалася на "Мінск-Арэне". Таксама дружына Дэйва Льюіса правяла 8 матчаў Еўравыкліку. Толькі дзве перамогі ў авертайме. Прапушчаных шайб - 19, закінутых - 14.
Максім Сушко, форвард зборнай Беларусі па хакеі: "Еўравыклік - гэта еўравыклік. Таму што ўсе хлопцы былі пад нагрузкамі. Трэніраваліся 6 або 8 тыдняў. Па 3 трэніроўкі на дзень было. І я не думаю, што была мэта выйграць усе матчы таварыскія. Бо гэтыя гульні - таксама падрыхтоўка да чэмпіянату свету. І я мяркую, што на чэмпіянаце свету ўсё будзе нашмат лепш. З'явяцца сілы - адыдуць ногі ад нагрузак. І з'явіцца свежасць у першую чаргу".
Сёлета нацкаманда моцна амаладзілася. Замест братоў Касціцыных, Андрэя Стася, Ніка Бэйлена прыцягнутыя новыя зоркі нашага хакея - Максім Сушко, Павел Варабей, Ягор Шаранговіч і Іван Кульбакоў. Паводле слоў Дэйва Льюіса, менавіта Кульбакоў зойме месца ў варотах у двух стартавых матчах чэмпіянату свету.
Канчатковы склад каманды на сусветны форум будзе сфарміраваны ў аўторак. Менавіта тады да зборнай далучыцца Джэф Плат - форвард ЦСКА. Да першынства каманда будзе яшчэ працаваць над рэалізацыяй, большасцю і меншасцю.
Зборная адправіцца ў Данію ў сераду. Чэмпіянат свету стартуе 4 мая.
Зборная Беларусі на планетарным форуме выступіць у актэце А. Каманда Дэйва Льіюса на групавой стадыі згуляе супраць Швецыі, Францыі, Расіі, Швейцарыі, Чэхіі, Аўстрыі і Славакіі.
У рэйтынгу Міжнароднай федэрацыі хакея, які быў абноўлены пасля Алімпіяды ў Пхёнчхане, беларусы размяшчаюцца на 11-м радку. У актыве 3 тысячы 200 балаў. З усіх сапернікаў пула нашы хакеісты апярэджваюць толькі французаў і аўстрыйцаў.
Аляксей Калюжны, начальнік цэнтра па падрыхтоўцы зборных каманд Федэрацыі хакея Беларусі, экс-капітан зборнай Беларусі па хакеі: "На гэты чэмпіянат свету прыязджае вельмі шмат гульцоў з Нацыянальнай хакейнай лігі. Як усе ведаюць, на Алімпіяду з Паўночнай Амерыкі гульцы не змаглі прыехаць. Таму шматлікія адклікаліся на запрашэнне сваіх зборных. І па ўзроўні, мне здаецца, што гэты чэмпіянат будзе вышэйшы за Алімпійскія гульні. Будзе нам вельмі складана, але ўсё-такі трэба гуляць і трэба шукаць варыянты, каб перамагаць".
16 краін, 400 гульцоў, арміі балельшчыкаў на трыбунах "Роял-Арэны" і "Юске-Банк-Боксен". Чакаецца, што чэмпіянат свету ўбачаць 1 мільярд 300 мільёнаў гледачоў. Сусветны форум пакажуць адразу тры каналы Белтэлерадыёкампаніі.
Павел Булацкі, дырэктар дырэкцыі тэлеканала "Беларусь 5": "Белтэлерадыёкампанія пакажа ў поўным аб'ёме ў прамым эфіры ўсе матчы чэмпіянату свету па хакеі. Тэлеканал "Беларусь 1" будзе трансліраваць гульні нацыянальнай зборнай. Тэлеканал "Беларусь 5" і "Беларусь 2" - усе астатнія гульні форуму таксама ў прамым эфіры. Акрамя гэтага, на пятай кнопцы будзе выходзіць дзённік чэмпіянату свету. У ім будзе агляд усіх гульняў, а таксама самая аб'ектыўная і свежая інфармацыя. Справа ў тым, што ў Даніі будуць працаваць брыгады Белтэлерадыёкампаніі - нашы журналісты, нашы калегі".
Пачне свой шлях на форуме беларуская зборная матчам супраць Швецыі. Старт гульні ў 21:15. Прамы эфір - на тэлеканале "Беларусь 1".
