Да сталіцы Алімпіяды ўжо тыдзень прыкаваныя нашы погляды. Сёння ў фокусе мужчынскі біятлон, індывідуальная гонка. Наўрад ці ў Беларусі хтосьці звязваў з гэтым стартам вялікія медальныя надзеі, і ўсё ж некаторая інтрыга захоўвалася. Менавіта гэтая гонка добрая тым, што непрадказальная - так гаварылі загадзя. Зрэшты, у француза Мартэна Фуркада быў на гэта свой погляд. У выніку галоўны фаварыт стаў зараз ужо двухразовым алімпійскім чэмпіёнам.
На тое, што такі сцэнарый паўторыцца заўтра, спадзяецца ўся Беларусь. У 5 вечара - індывідуальная гонка ў жанчын. Дар'я Домрачава ў выдатнай форме. Мы ўсе спадзяемся, што яна паўторыць свой поспех. У скарбонцы беларускай зборнай медаль пакуль адзін. Зрэшты, наперадзе зноў вялікія старты.
Пра іх і не толькі з Сочы Мікалай Стула.
Мужчынскі беларускі біятлон меў у Сочы толькі адзін шанц. Індывідуальная гонка - самая непрадказальная. Людзі, якія добра страляюць, маюць тут больш шанцаў, чым тыя, хто добра бяжыць на лыжах. Кожны промах на мяжы - гэта дадатковая хвіліна, яе нагамі не адыграць нават самаму заўзятаму спрынтару.
Тут на вышыні 1600 метраў сёння быў і яшчэ адзін беларускі інтарэс. Лыжніца Алена Саннікава выступала ў самай любімай сваёй дысцыпліне - 10 кіламетраў класічным стылем. Трэба разумець: патэнцыял нашых лыжнікаў на гэтым этапе развіцця ў прынцыпе невысокі, таму вынік у першай трыццатцы бачыўся нармальным.
А ўжо ў пятніцу зноў выйдзе на старт Дар'я Домрачава. Упершыню ў статусе алімпійскай чэмпіёнкі. Напярэдадні Дар'я прыняла ўдзел у цырымоніі ўзнагароджвання і паабяцала, што прыемныя клопаты, звязаныя са святкаваннем перамогі, не паўплываюць на вынікі індывідуальнай гонкі.
Самая доўгая дыстанцыя - яшчэ і магчымасць трэнерам прыкінуць састаў на эстафету. У нашай камандзе па-ранейшаму няма ярка выяўленага чацвёртага нумара.
Скласці канкурэнцыю біятлону ў пятніцкім тэлеэфіры можа і фрыстайл. Але толькі ў тым выпадку, калі Ала Цупер праб'ецца ў фінал. На папярэдніх алімпіядах ад яе многага чакалі, і яна не спраўлялася з эмоцыямі. Зараз груз адказнасці меншы: Ала толькі нядаўна выйшла з дэкрэтнага водпуску.
Фрыстайлісты ў Сочы ўжо адаптаваліся. Усё па плане і толькі Дзмітрый Дашчынскі дагэтуль змагаецца з траўмай пляча.
Мужчыны будуць скакаць на Алімпіядзе 17 лютага. Тады ж запланаваны і жаночы біятлонны мас-старт. Гэта самы насычаны дзень у беларусаў на Алімпіядзе!
