Для спартсменаў гэтыя дні лёсавызначальныя - яны вызначаюць паспяховасць выступлення кожнага ў сезоне, бо ўжо наступны год адзначаны Алімпіядай у Паўднёвай Карэі. Сярод галоўных герояў і Дар'я Домрачава. Трохразовая алімпійская чэмпіёнка імкліва набірае форму. І вельмі спадзяёмся, што менавіта Хохфільцэн стане знакавым для вяртання адной з самых тытулаваных спартсменак у гісторыі. Аб выніках першага дня - Андрэй Казлоў.
10 снежня 2011 года ў аўстрыйскім Хохфільцэне Дар'я Домрачава паднімаецца на найвышэйшую прыступку п'едэстала этапу Кубка свету.
На самым фінішы гонкі праследавання будучая прыма біятлона абыходзіць і расіянку Вольгу Зайцаву, і немку Магдалену Нойнер, здаецца, непераможную. І гэта наперадзе ў Дар'і тры алімпійскія залатыя ўзнагароды Сочы, перамога ў Кубку свету. А тады гэта было толькі пятае першае месца ў кар'еры.
Праз больш чым пяць гадоў аўстрыйскі Хохфільцэн закліканы стаць месцам вяртання Дар'і Домрачавай у біятлон.
Так, за спінай у беларускі ўдзел у трох этапах сезона - Рупольдынг, Оберхоф і Антхольц. Але ўсе разумеюць, што галоўныя біятлонныя спаборніцтвы ў гэтым перадалімпійскім сезоне - чэмпіянат свету, які як раз пройдзе ў Хохфільцэне.
Дар'я Домрачава, трохразовая алімпійская чэмпіёнка, біятланістка зборнай Беларусі: "Усёй мэтай гэтага сезона я сабе пазначыла ўліцца ва ўсю гэтую спаборніцкую атмасферу, даць арганізму прачуць барацьбу, ну і пра нейкія вынікі не думала і не думаю зараз".
Аб сваіх планах Дар'я Домрачава гаварыла асцярожна, але з кожнай гонкай вынікі раслі. У некаторых з іх яна была ў топе па паказчыку хуткасці па дыстанцыі. Італьянскі Антхольц стаў апошнім месцам, дзе зборная Беларусі спрабавала свае сілы перад ключавым стартам сезона. І нават у гатэлі, дзе мяркуецца адпачынак, нашы дзяўчаты працягвалі трэніравацца. Менавіта стральба - сёння наш галоўны рэзерв. Нават у параўнанні з мінулым сезонам у пераважнай большасці біятланістаў вынікі ў гэтым практыкаванні знізіліся.
Ірына Крыўко, біятланістка зборнай Беларусі: "Па выніках этапаў Кубка свету я разумею, што ўсё магчыма, калі добрая стральба, калі добра гатовы лыжы, добрае самаадчуванне, то можна паказваць добрыя вынікі".
Чэмпіянат свету расцягнецца на 11 дзён. Першая індывідуальная адбудзецца заўтра - гэта жаночы спрынт. 17 і 18 лютага запланаваныя эстафетныя гонкі. А завершыцца спаборніцкая праграма ў Хохфільцэне мас-стартамі, 19 лютага. Усе гонкі будуць паказаныя ў прамым эфіры на тэлеканале "Беларусь 5".
Ужо сёння змяшаная эстафета адкрывала праграму аўстрыйскага чэмпіянату свету. Дар'ю Домрачаву трэнерскі штаб вырашыў паберагчы. На дыстанцыю выйшлі Надзея Скардзіна, Ірына Крыўко, Уладзімір Чапелін і Сяргей Бачарнікаў. Беларусы займаюць 22 месца.
Змяшаная эстафета не стала, ды і не магла стаць нашым прыярытэтам у Аўстрыі. А вось заўтра жанчыны пабягуць спрынт - і гэта будзе вельмі цікава.
Але ўсе вынікі гонкі зацямніў вось гэты эпізод. І не адзін. Лідар сучаснага біятлона Марцен Фуркад вось так некарэктна паставіўся да расійскага біятланіста Аляксандра Логінава, які ўжо адбыў дыскваліфікацыю за ўжыванне допінгу, але ўсё роўна чуў папрокі ад Фуркада. І француз падрэзаў Логінава з лыжні, які потым зваліўся.
А ўжо падчас узнагароджання рэжысёры адвялі тэлекамеры ад моманту, калі французы і расіяне ціснулі адзін аднаму рукі. Але відаць, што ні Логінаў, ні Антон Шыпулін да Фуркада не дайшлі.
А чэмпіянат свету толькі пачаўся.
