У Вене пройдзе некалькі раўндаў перамоў Кіраўніка нашай дзяржавы з кіраўніцтвам гэтай краіны. На сустрэчы з федэральным прэзідэнтам будуць абмяркоўвацца пытанні гандлю, інвестыцыйнага супрацоўніцтва, не абыдуць бокам і палітычныя тэмы. Паралельна будзе праходзіць і беларуска-аўстрыйскі бізнес-форум. Эксперты ўжо завуць гэты візіт Аляксандра Лукашэнкі важным не толькі для Мінска і Вены, але і ў цэлым для развіцця адносін Беларусі з ЕС.
З аўстрыйскай сталіцы перадае наш палітычны аглядальнік Наталля Брэвус.
11-12 лістапада Прэзідэнт Беларусі здзейсніць афіцыйны візіт у Аўстрыю
Некалькі тыдняў таму Аляксандр Лукашэнка, калі анансаваў візіт у Аўстрыю, распавёў, якой яму бачыцца задача прэзідэнта пры наладжванні дыялога і гандлёвага супрацоўніцтва з замежнымі партнёрамі. Дык вось, задача першай асобы - прасекчы акно, каб услед пацягнуліся чыноўнікі і бізнес. Пасля перыяду санкцый Вена здольная стаць для ўсіх прыкладам пераадолення перадузятасцяў. Гэты візіт, і праўда, можа стаць важным для беларуска-аўстрыйскіх адносін, новым акном у Еўропу для Мінска.
Тое, што беларускі Прэзідэнт едзе менавіта ў Вену, эксперты завуць цалкам лагічным і чаканым. Аўстрыя заўсёды прагматычна і выразна была настроеная на супрацоўніцтва, нягледзячы на стаўленне да Беларусі афіцыйнага Бруселя. Заўсёды падтрымлівала нашы высілкі ў наладжванні дыялога з ЕС. А апошнія гады для Мінска і Вены адзначаліся пазітывам амаль ва ўсіх кірунках эканамічнага ўзаемадзеяння. Працэнтаў на 20 падрос наш тавараабарот, ды і аўстрыйскія інвестыцыі - а гэта 300 мільёнаў долараў толькі за мінулы год - уліваюцца ў беларускую эканоміку.
Аўстрыя ўваходзіць у спіс найбуйнейшых інвестараў у эканоміку Беларусі
Адначасова з візітам Кіраўніка дзяржавы ў Вене будуць праходзіць сустрэчы дзелавых колаў - прыедзе больш як дзве сотні прадстаўнікоў кампаній. Свой удзел у форуме пацвердзілі і ўладальнікі буйнога аўстрыйскага бізнесу. У Мінска і Вены ўжо ёсць паспяховы вопыт супрацоўніцтва ў самых розных сферах - ад энергетыкі, дрэваапрацоўкі, транспарту да перапрацоўкі сельгаспрадукцыі, тэлекамунікацый і банкаўскага сектара.
У Вене пройдзе аўстрыйска-беларускі бізнес-форум
Грэгар Постль, рэгіянальны менеджар па Паўднёва-Усходняй, Усходняй Еўропе і Цэнтральнай Азіі федэральнай палаты эканомікі Аўстрыі: "Ёсць патэнцыял у павелічэнні паставак вашых тавараў на наш рынак. І пытанне, чаму пакуль гэтага не адбылося, не ў беларускай якасці. Зусім не. Праблема ў тым, што тут у Аўстрыі іх проста вельмі мала ведаюць. Розныя бізнес-форумы, абмены дэлегацыямі (а такія сустрэчы ў нас рэгулярныя) дапамагаюць бліжэй пазнаёміцца з асартыментам тавараў адно аднаго. Уваходжанне Беларусі ў СГА (мы ведаем, што зараз гэтае пытанне як ніколі актывізавалася) дасць некаторы штуршок для нарошчвання ўзаемнага тавараабароту".
Бізнесу сапраўды не пашкодзіць выразны палітычны сігнал. У гэтыя дні ў Вене пройдзе некалькі раўндаў перамоў Кіраўніка беларускай дзяржавы з кіраўніцтвам краіны. Пытанні гандлю, інвестыцый, таксама палітычныя тэмы абмяркуюць з Федэральным прэзідэнтам Аўстрыі Аляксандрам ван дэр Беленам. Размова пойдзе пра сітуацыю ў рэгіёне і свеце, узаемадзеянне Беларусі з Еўрасаюзам, у тым ліку ў фармаце "Усходняга партнёрства".
