Прэзідэнт Аляксандр Лукашэнка сустрэўся з паслом Грузіі Валерыем Кварацхеліяй. Такая практыка - рэгулярныя зносіны Кіраўніка дзяржавы з прадстаўнікамі дыпкорпуса - стала добрай традыцыяй. У першую чаргу гэта добрая магчымасць правесці рэвізію ўзаемадзеяння і вызначыць новыя перспектывы. Тым больш такая нагода - вось ужо амаль тыдзень у Грузіі новы прэзідэнт. Ім стала Саламэ Зурабішвілі. Аднак гэта ніяк не ўплывае на двухбаковыя адносіны – усё-такі для іх развіцця зроблена нямала, у тым ліку дзякуючы цесным кантактам на вышэйшым узроўні. Чарговыя праекты былі вызначаны падчас візіту беларускага лідара ў Грузію сёлета ў сакавіку. Але, вядома, з улікам абноўленага складу кіраўніцтва гэтай краіны трэба, што называецца, зверыць гадзіннікі. Падчас сустрэчы размова ішла і аб планах маючых адбыцца кантактаў, і аб перспектывах далейшага ўзаемадзеяння.
Усе падрабязнасці ў Ілоны Красуцкай.
Ужо амаль тыдзень у Грузіі новы прэзідэнт. І гэта жанчына! Саламэ Зурабішвілі. Аднак гэты факт (змена ўлады) не значыць, што краінам прыйдзецца пачынаць усё з нуля.
Трывалы падмурак у двухбаковых адносінах закладзены даўно. Дружба народаў, дзясяткі праектаў, пастаянныя кантакты на ўсіх узроўнях - гарантаваная падушка бяспекі. І адна з асноўных задач зараз - канвертаваць актыўны палітычны дыялог у канкрэтныя гандлёва-эканамічныя праекты.
Гэта, бадай, той самы выпадак, калі мяняецца прэзідэнт, урад (новы склад у чэрвені), але не палітыка. Наша краіна прытрымліваецца ўсё таго ж курсу - на пабудову ўзаемавыгадных адносін. А для гэтага створаны ўсе ўмовы.
Новыя нішы супрацоўніцтва вызначаны ў сакавіку падчас візіту беларускага лідара ў Грузію. Тады ж было адкрыта прадпрыемства па зборцы ліфтаў, а зараз завяршаецца работа па арганізацыі ў Батумі яшчэ аднаго - па зборцы малых трактароў МТЗ. Але ёсць і мноства іншых сфер, дзе, як гаворыцца, неаранае поле. У развіцці менавіта такога шматпланавага супрацоўніцтва зацікаўлена наша краіна.
І гэта яшчэ раз было пацверджана сёння на сустрэчы з паслом Грузіі ў Палацы Незалежнасці. Валерый Кварацхелія вопытны дыпламат. З улікам абноўленага складу кіраўніцтва краіны яму прыйдзецца працаваць у цеснай звязцы з урадам - вярстаць план не толькі маючых адбыцца кантактаў, але і праектаў.
Віцэ-прэм'ер Міхаіл Русы, які ўзначальвае міжурадавую камісію па эканамічным супрацоўніцтве, напярэдадні сустрэўся ў Тбілісі з прэм'ерам Грузіі. Адна з ключавых тэм перамоў - павелічэнне ўзаемнага тавараабароту. Ён летась наблізіўся да сотні мільёнаў долараў. Па выніках гэтага года невялікае зніжэнне за кошт выканання кантракта на пастаўку прадукцыі брэнду "Штадлер", але ўжо абмяркоўваецца новы. Магчымасці для росту тавараабароту ёсць і ў пастаўках харчавання, прадукцыі дрэваапрацоўкі, лекаў, сумесных праектаў у транспартна-лагістычнай сферы.
Прамысловая кааперацыя поўнасцю адпавядае эканамічным інтарэсам Беларусі і Грузіі, а ў перспектыве краіны маюць намер выходзіць з сумеснай прадукцыяй на рынкі трэціх краін. Вывучаецца магчымасць паставак электробусаў Белкамунмаша, камунальнай і грузавой тэхнікі МАЗ.
Валерый Кварацхелія, Надзвычайны і Паўнамоцны Пасол Грузіі ў Беларусі: "Гэта была вельмі важная сустрэча з чалавекам, які вельмі добра, з разуменнем ставіцца да Грузіі. Размова ішла і па палітычных пытаннях. У нас праводзіцца палітыка паразумення, узаемадапамогі адно аднаму. Разглядалася тэматыка гандлёва-эканамічнага супрацоўніцтва, дзе таксама ёсць добрая дынаміка. Асобна абмяркоўвалася пытанне турыстычнага абмену. Па ўсіх пытаннях, якія я задаў, атрымаў адказы і разуменне. Гэта вельмі важна. І яшчэ раз было падкрэслена, што паміж Беларуссю і Грузіяй закрытых тэм няма".
Пастаянныя абмены візітамі ўрада, парламента, бізнесу. Выставы-продажы беларускіх прадуктаў у Тбілісі. Навінкі з'яўляюцца ў сетцы магазінаў з назвамі "Беларускі" і "Бульбаш". У Тбілісі іх з дзясятак, і адрас ведае кожны мясцовы жыхар. Прамыя авіязносіны, прывабныя цэны на білеты ад нацыянальнага перавозчыка і як вынік - Грузія ў дзясятцы краін, якія часцей за ўсё наведваюць беларусы. Сапраўды, нягледзячы на змену палітычных пасад, рангаў, цёплыя сяброўскія адносіны і сувязі паміж народамі нязменныя.
Ну а новы план кантактаў вызначаны і на высокім узроўні. У пачатку будучага года ў Мінску чакаюць кіраўніка грузінскага МЗС, а вясной - прэм'ер-міністра гэтай краіны. І, як было адзначана сёння на сустрэчы ў Палацы Незалежнасці, у Беларусі з візітам чакаюць і новага прэзідэнта Грузіі.
