Запланаваны перамовы з Прэзідэнтам Італьянскай Рэспублікі Серджыа Матарэлам. Мяркуецца разгляд двухбаковых кантактаў з акцэнтам на гандлёва-эканамічнае і інвестыцыйнае ўзаемадзеянне, развіццё кааперацыйных сувязяў. Асобная ўвага фарміраванню паўнавартаснай нарматыўнай базы. Падчас візіту ў Ватыкан адбудзецца сустрэча з Папам Рымскім Францыскам. На ёй абмяркуюць далейшае развіццё супрацоўніцтва Беларусі з Рымска-каталіцкай царквой. Як відаць, спектр тэм шырокі. І гэты візіт беларускага Прэзідэнта стане новай вяхой у гісторыі двухбаковых адносін. Ужо сёння на тэрыторыі Беларусі працуе больш за 200 сумесных вытворчасцяў, распрацоўваюцца і новыя кантракты, пастаянныя візіты на ўсіх узроўнях. Аб узаемнай цікавасці Мінска і Рыма - наш карэспандэнт Наталля Брэвус.
На стале ў Міхаіла Дашука інвестпраекты па лініі Беларусь - Італія. Гэтыя бізнес-планы пакуль толькі на паперы. Але фінансавая падтрымка партнёраў з Рыма ў будучыні дазволіць увасобіць іх у жыццё. Гавораць, пасля зацішша сёння перамовы ў актыўнай фазе. Летась беларуская эканоміка атрымала амаль 30 мільёнаў долараў ад італьянцаў. Сёлета чакаюць прыросту.
Міхаіл Дашук, кіраўнік Дэпартамента нацыянальнага агенцтва інвестыцый і прыватызацыі: "Спачатку года ў агенцтва звярнулася больш за 10 італьянскіх кампаній. Арганізаваны візіты ў Рэспубліку Беларусь 12 італьянскіх кампаній. у тым ліку забяспечаны сустрэчы з профільнымі міністэрствамі, з профільнымі ведамствамі. Зараз гэтыя праекты, іх ініцыятывы прапрацоўваюцца. Сумы розныя. Хтосьці плануе інвеставаць да 10 мільёнаў долараў, хтосьці дзясяткамі лічыцца".
Гісторыі дыпадносін Беларусь - Італія амаль чвэрць стагоддзя. Пратакол падпісалі ў 1992. Тады ж у Мінску адкрылі і пасольства, а праз год - беларускае генконсульства ў Рыме. У 98-м Беларусь прызначае Надзвычайнага і Паўнамоцнага Пасла ў Італьянскую Рэспубліку. Доўгі час двухбаковыя кантакты падтрымліваліся на ўзроўні МЗС і парламентаў.
Новым этапам стаў 2009-ы. У Рыме Прэзідэнта Беларусі Аляксандра Лукашэнку прымае прэм'ер-міністр Італіі Сільвіа Берлусконі.
Гістарычная сустрэча адбылася тады і ў Ватыкане з Папам Рымскім Бенядзіктам XVI. Яе назвалі сусветнай падзеяй. Аўдыенцыя прайшла ў Апостальскім палацы.
Візіт у Ватыкан - заканамерны працяг унутранай і знешняй палітыкі Беларусі па ўмацаванні міжканфесійнага міру і згоды, наладжванні адносін на аснове сяброўства і даверу.
Ужо ў тым жа 2009-м, толькі восенню, італьянскага прэм'ера прымалі ў Беларусі. Асноўная тэма перамоў - бізнес-супрацоўніцтва. Тады падпісалі шэраг міжнародных дамоў па эканоміцы, тым самым адчыніўшы новыя дзверы не толькі для палітычнага дыялогу, але і для бізнесу.
Менавіта бізнесмены першымі адрэагавалі на адмену ўсялякіх абмежаванняў сёлета. У лютым прайшоў бізнес-форум. Ужо летам у чэрвені чакаюць чарговы дэсант італьянскага бізнесу.
Уладзімір Улаховіч, намеснік старшыні Беларускай гандлёва-прамысловай палаты: "Вельмі важна выйсці на канкрэтныя новыя праекты. Адзін з такіх праектаў вельмі цікавы. Гэта наша беларускае прадпрыемства "Эрыт Гроўт", якое вырабляе інавацыйнае ўгнаенне, што прайшло тэсціраванне на італьянскім рынку. Падпісана першае пагадненне на вельмі сур'ёзную лічбу. На падыходзе другое пагадненне. І праз італьянскага партнёра такога роду інавацыйная прадукцыя будзе запатрабавана на ўсім еўрапейскім рынку".
І такія кантракты як нельга дарэчы. Бо цікавасць ёсць і да тавараў, і да паслуг, але пакуль вялікімі аб'ёмамі пахваліцца не можам.
Нестабільнасць сусветнай эканомікі летась ударыла і па беларуска-італьянскім тавараабароце. Лічбы гавораць тут самі за сябе. Аб'ёмы знізіліся ў параўнанні з 2014 і 2013 гадамі амаль утрая. У тыя гады мы гандлявалі за 2 мільярды долараў. У мінулым не дацягнулі і да 800 мільёнаў.
У Італіі мы купляем высокатэхналагічныя станкі і мадэрнізуем сваю прамысловасць. Італьянцы ж зацікаўлены ў сумесных вытворчасцях. Адзін з паспяховых прыкладаў - вытворчасць мацарэлы ў Маладзечне. А вось на гэтым новым прадпрыемстве ўжо года паўтара выпускаюць найноўшае абсталяванне - рукавы высокага ціску. Больш за 12 мільёнаў еўра інвестыцый, 100 новых рабочых месцаў. Такіх заводаў у італьянцаў па ўсім свеце 4. Беларускі нічым не адрозніваецца ад філіялаў у Італіі, Польшчы і Кітаі.
6 гадоў беларусы разам з італьянцамі шыюць і абутак. Італьянскія калодкі, абцасы і дызайн, а вось скура і фурнітура - айчынныя. Гэта робіць калекцыю еўрапейскай якасці больш даступнай па цане. Як і лініі беларуска-італьянскіх касметычных сродкаў. Іх з задавальненнем купляюць і суайчыннікі, і госці. Партыі ідуць і на экспарт.
Італія ўваходзіць у групу лідараў па колькасці створаных сумесных і замежных прадпрыемстваў у Рэспубліцы Беларусь. Прагматычныя апенінцы разумеюць, што для іх Беларусь не проста даўні партнёр па супрацоўніцтве ў гуманітарнай сферы, але і эканамічная магчымасць выхаду на рынак Еўразійскага эканамічнага саюза.
