На сувязі Байканур: касмічны экіпаж звязаўся з Прэзідэнтам Беларусі. Каманда да старту гатовая! Пасля вяртання на Зямлю іх чакае вялікая размова пра перспектывы Беларусі як касмічнай дзяржавы і адпачынак на роднай зямлі.
На сувязі Байканур!
Усяго два дні застаюцца да знакавай падзеі. Упершыню ў гісторыі суверэннай краіны беларускі грамадзянін адправіцца ў космас. На борце карабля "Саюз МС-25" пад камандаваннем Алега Навіцкага ў складзе асноўнага экіпажа наша Марына Васілеўская.
Зараз члены экіпажа знаходзяцца на касмадроме Байканур і рыхтуюцца да хуткага старту. Яны правядуць на борце станцыі 12 сутак. Аляксандр Лукашэнка пацікавіўся здароўем і гатоўнасцю экіпажа. Паводле слоў касманаўтаў, у іх вельмі баявы настрой, у тым ліку дзякуючы каласальнай падтрымцы, якую яны адчуваюць на працягу ўсёй падрыхтоўкі да палёту. Пасля вяртання з космасу Прэзідэнт чакае экіпаж у Беларусі.
Айчынная касмічная галіна ўпэўнена развіваецца
Касмічную сферу Аляксандр Лукашэнка часта называў сярод асноўных кірункаў, якія ўзнімаюць нацыю на больш высокі ўзровень развіцця. 20 гадоў спатрэбілася, каб запусціць працэс адбору і падрыхтоўкі да палёту першага касманаўта ў суверэннай гісторыі Беларусі. У 2001 годзе падчас візіту Аляксандра Лукашэнкі ў Расію гаварылі пра запуск сумеснага беларуска-расійскага касмічнага спадарожніка. І тады наш Прэзідэнт заявіў, што касманаўт з Беларусі абавязкова паляціць у космас. У лістападзе 2021-га Лукашэнка і Пуцін дамовіліся аб уключэнні ў склад экіпажа МКС беларускага касманаўта. Пасля вяртання касмічнага карабля дыялог аб далейшых сумесных з Расіяй палётных праектах працягнецца.
Запуск карабля "Саюз МС-25" да МКС запланаваны на 21 сакавіка
Марына Васілеўская прызналася, што ўвага беларусаў і асабіста Прэзідэнта надае ёй вялікую сілу. Падтрымаюць касманаўтку і яе родныя. Чартарным рэйсам на Байканур прыбудуць бацькі і блізкія Марыны Васілеўскай, а таксама сябры, калегі, маладыя навукоўцы і прадстаўнікі грамадскасці. Запланавана, што касмічны карабель "Саюз МС-25" даставіць касманаўтаў на МКС у чацвер. Старт прызначаны на 16:21. Стыкоўка павінна адбыцца праз 3 гадзіны. На Зямлю касманаўты вернуцца 2 красавіка.
