Практычна ўсе чэмпіянаты свету гэтага сезона ўжо завершаны, таму можна падводзіць вынікі. Нашы атлеты заваявалі восем узнагарод, дзве з іх залатыя. Асноўныя надзеі на галоўным старце чатырохгоддзя звязаны з веслярамі і пяціборцамі. У той жа час шэраг відаў спорту і дысцыплін, у якіх беларусы традыцыйна моцныя, да прызавых месцаў на сусветным узроўні не дацягвае. Адсюль і складанасці яшчэ на этапе адбору на Гульні ў Токіа. Для спорту вышэйшых дасягненняў у краіне зроблена нямала, бо вынікі атлетаў - гэта імідж краіны. І менавіта за вынік патрабуюць і ўзнагароджваюць.
Самая пільная ўвага - летнім алімпійскім відам
Добры вынік, які паказалі беларусы на дамашніх Еўрапейскіх гульнях, не прычына для самазаспакаення. Канкурэнцыя на сусветным узроўні значна больш сур'ёзная. Тым не менш, і тут у нас традыцыйныя медальныя перспектывы.Барацьба за права выступіць на Гульнях у Токіа прадоўжыцца да канца чэрвеня будучага года. У нацыянальнай камандзе ёсць яшчэ каля 200 кандыдатаў на ліцэнзіі, якія прадстаўляюць 28 відаў спорту.