Вялікі кадравы дзень у Кіраўніка дзяржавы. Сёння ў Віцебскай вобласці з'явіўся новы памочнік Прэзідэнта - галоўны інспектар па Віцебшчыне.
Ім стаў Аляксандр Пазняк. Яго галоўная задача, як яе бачыць беларускі лідар, - стварэнне разам з губернатарам моцнага кадравага рэзерву кіраўнікоў для вырашэння праблем вобласці, многія з якіх хранічна цягнуцца яшчэ з савецкіх часоў.
Новая асоба і ў беларускай дыпламатыі ў Італіі. Паслом у рэспубліцы прызначаны Аляксандр Гур'янаў. Раней ён курыраваў знешнюю эканоміку ў МЗС. І гэта прызначэнне далёка не выпадкова. Менавіта эканоміка, а больш дакладна, экспарт, паводле даручэння Аляксандра Лукашэнкі, на 90 % - гэта заданне для ўсяго міністэрства на будучы год. Тым больш Італія ў дзясятцы найбуйнейшых эканомік свету. Беларусь удала прадставіла свой патэнцыял на "Экспа" ў Мілане, а ў працэсе стварэння сёння - каля 2 дзясяткаў новых сумесных вытворчасцяў ад металапракату да новай энергетыкі.
Яшчэ адно важнае прызначэнне - у сілавым блоку. Прэзідэнт узгадніў кандыдатуру Віктара Клімава, пракурора Брэсцкай вобласці. У святле новых канфліктаў рэгіён выклікае асаблівую трывогу ў Кіраўніка дзяржавы. Адсюль даручэнне - жорстка адстойваць нацыянальныя інтарэсы і захоўваць асабістую прынцыповасць і незалежнасць.
Таксама сёння Кіраўнік дзяржавы ўзгадніў прызначэнне 12 новых, але ўжо вопытных кіраўнікоў раённых выканкамаў і двух намеснікаў кіраўнікоў абласных камітэтаў.
У Віцебскі рэгіён адпраўляецца Віктар Аскерка. У яго амбіцыйная задача - на новы ўзровень вывесці стварэнне інтэграваных агракомплексаў. Яны ўключаюць увесь цыкл вытворчасці прадуктаў харчавання - ад поля да прылаўка. Прычым прылаўкаў у фірменных магазінах як у Беларусі, так і за мяжой. Гэта дазволіць аграбізнесу стаць бізнесам паўнаважкім, г.з. зарабляць прыбытак самастойна, без шырокіх укладанняў з боку дзяржавы.
На пасаду першага намесніка Гомельскага аблвыканкама Прэзідэнт узгадніў кандыдатуру Аляксандра Мікалуцкага. На ранейшай пазіцыі кіраўніка ў Жыткавіцкім раёне ён у цэлым справіўся і з найскладанейшым этапам мадэрнізацыі, і з выкананнем даручэнняў Прэзідэнта як па экспарце, так і па сацыяльных стандартах.
Зрэшты, прызначэнне часткова вымушанае. Ранейшы першы намеснік і яшчэ два з паловай дзясяткі кіраўнікоў і кантралёраў сёння пад следствам як фігуранты гучнай справы - спроба збыць няякаснае мяса, у тым ліку дзецям. Прэзідэнт папярэдзіў - прабачэння за такія махінацыі, асабліва са здароўем беларусаў, не будзе.
Кіраўнік дзяржавы таксама даў згоду на прызначэнне Уладзіміра Муквіча намеснікам міністра па падатках і зборах, Віктара Сідаровіча - дырэктарам Дэпартамента дзяржінспекцыі працы Мінпрацы і сацабароны, а Міхаіла Малашанкі - намеснікам старшыні Дзяржкамітэта па стандартызацыі. З гэтага часу ён будзе адказваць за энергаэфектыўнасць. Акрамя таго, Прэзідэнт узгадніў прызначэнне трох новых кіраўнікоў у Гомельскі і Мінскі аблвыканкамы.
У цэлым беларускі лідар назваў будучы год вельмі складаным, ён стане чарговым выпрабаваннем для вертыкалі ўлады. А таму Прэзідэнт запатрабаваў ад кіраўнікоў усіх узроўняў сабранасці, асабістай прыстойнасці, ініцыятыўнасці, але без небяспечных і неабдуманых эксперыментаў. Інтарэсы і абароненасць людзей працы і надалей будуць галоўнымі крытэрыямі ацэнкі эфектыўнасці кіраўніцкіх кадраў.
