Ад саюзнай эканомікі да сусветнай палітыкі, цэнтрам якой літаральна праз два тыдні зноў стане Мінск. Беларуская сталіца рыхтуецца прыняць сесію Парламенцкай асамблеі АБСЕ. Гэта самае маштабнае міжнароднае палітычнае мерапрыемства ў гісторыі нашай краіны. Удзел пацвердзілі каля 600 прадстаўнікоў з 56-ці краін. Апошнюю падрыхтоўку да форуму сёння абмеркавалі ў Прэзідэнта. Кіраўнік дзяржавы сустрэўся са спікерам Палаты прадстаўнікоў. А ў Маскве наша здымачная група сустрэлася з дэлегатамі вялікага "мінскага форуму". Аляксей Марцінёнак прадоўжыць.
Не прайшло і тыдня пасля сустрэчы ў Мінску парламентарыяў Саюзнай дзяржавы, і зноў час браніраваць білеты ў сталіцу Беларусі. Зараз ужо ў фармаце АБСЕ дэпутаты збяруцца абмеркаваць глабальныя міжнародныя пытанні. Больш за палову гасцей ужо пацвердзілі ўдзел. У тым ліку і Леанід Слуцкі. У расійскай Дзярждуме ён якраз адказвае за знешнюю палітыку.
АБСЕ - найбуйнейшае ў свеце аб'яднанне, якое ставіць у аснову асноў бяспеку ў транскантынентальным маштабе. Аб'ядноўвае 57 краін Еўропы, Азіі і Паўночнай Амерыкі, плюс партнёраў па супрацоўніцтве.
Парламентарыі гэтых краін штогод у ліпені праводзяць вялікія форумы ў сталіцах дзяржаў - удзельнікаў АБСЕ. Асамблея сама выступіла з ініцыятывай менавіта ў Мінску арганізаваць 26-ю сесію. Гэтакі адказ міжнароднай супольнасці на ўклад Беларусі ў стабільнасць свайго рэгіёна.
Такі маштабны палітычны форум наша краіна будзе прымаць упершыню. Для работы парламентарыяў рыхтуюць адразу дзве пляцоўкі: "Прэзідэнт-Гатэль" і выставачны комплекс на праспекце Пераможцаў. Сюды ўжо завозяць спецыяльную тэхніку: у Парламенцкай асамблеі свае стандарты вялікіх мерапрыемстваў.
Беларусь умее прымаць гасцей, і, вядома, заўсёды прыходзіцца ўлічваць новыя нюансы пратакола. На гэты раз трэба будзе забяспечыць сінхронны пераклад пасяджэнняў адразу на шэсць афіцыйных моў АБСЕ - англійскую, іспанскую, італьянскую, нямецкую, французскую і рускую. Вядома, і ўвесь гасцінічны фонд сталіцы чакае гарачы пачатак ліпеня: сотні ўдзельнікаў вялікага інтэрнацыянальнага дыялогу ўжо браніруюць месцы. АБСЕ - антыканфліктнае аб'яднанне. Выступае за стабільнасць і ўрэгуляванне разнастайных крызісаў.
Прыхільнасць Беларусі тым жа прынцыпам абазначыў Прэзідэнт сёлета ў сакавіку на сустрэчы са старшынёй Парламенцкай асамблеі Крысцін Мутанен. Асноўны пасыл: Мінск зробіць усё, каб гэта была лепшая ў сваёй гісторыі сесія.
Спікер ніжняй палаты парламента два разы на год абмяркоўвае з Прэзідэнтам работу дэпутацкага корпусу. Цяперашняе, шостае скліканне, на гэты момант ужо прыняло 32 законапраекты. Але сёння на парадку дня рашэнні іншага парадку. Наперадзе мерапрыемства вельмі важнае з пункта погляду іміджу дзяржавы, але галоўнае - гэта магчымасць выразна абазначыць сваю пазіцыю і быць пачутым на міжнароднай палітычнай арэне.
Не толькі арганізацыйна, але і па сутнасці. Беларусь рыхтуе для разгляду на летняй сесіі і сваю рэзалюцыю: комплекс прапаноў па процідзеянні новым відам наркотыкаў.
Уладзімір Андрэйчанка, Старшыня Палаты прадстаўнікоў Нацыянальнага сходу Беларусі: "Гэтая рэзалюцыя накіравана на барацьбу са з'яўленнем і распаўсюджваннем новых відаў псіхаактыўных рэчываў, гэта значыць на барацьбу з наркотыкамі. Гэтую беларускую рэзалюцыю на сённяшні дзень падтрымалі 20 дзяржаў, 44 парламентарыі. І я спадзяюся, што яна будзе ўключаная ў парадак дня сесіі і прынятая на сесіі Парламенцкай асамблеі".
Асноўная тэма форуму - умацаванне ўзаемнага даверу і супрацоўніцтва ў імя міру і росквіту ў рэгіёне. Ад кібербяспекі і тэрарызму да незаконнай міграцыі. Праграмныя вострыя пытанні відавочна перагукаюцца з беларускімі ініцыятывамі ў ААН і іншых міжнародных арганізацыях.
Зрэшты, і цесная праца са структурамі АБСЕ таксама даўно наладжаная. Прадстаўнікі афіцыйнага Мінска толькі летась прынялі ўдзел у чатырох мерапрыемствах пад эгідай гэтай арганізацыі.
Таццяна Корань, палітолаг: "Немалаважную ролю адыгрывае геапалітычная пазіцыя Беларусі паміж Усходам і Захадам. Тут немалаважную ролю адыгрывае шматвектарнасць беларускай знешняй палітыкі, наша гатоўнасць, і правядзенне перамоў з іншымі дзяржавамі на раўнапраўнай аснове, і, безумоўна, наша гістарычнае мінулае".
Уладзімір Андрэйчанка, Старшыня Палаты прадстаўнікоў Нацыянальнага сходу Беларусі: "Не сакрэт, што на сённяшні дзень менавіта недахоп даверу - гэта галоўная прычына таго, што краіны не могуць забяспечыць для сваіх людзей такія базавыя прынцыпы, як мір, стабільнасць і дабрабыт. Таму ў цэнтры ўвагі гэтай сесіі менавіта гэтыя пытанні. Таксама пытанні барацьбы з тэрарызмам, арганізаванай злачыннасцю, карупцыяй, сітуацыя на Украіне, на Блізкім Усходзе будзе абмяркоўвацца".
