Шырокі спектр пытанняў у адносінах дзвюх краін абмяркоўвалі сёння падчас сустрэчы Кіраўніка беларускай дзяржавы і старшыні Нацыянальнай асамблеі Эквадора. Умацуе гандлёва-эканамічнае супрацоўніцтва, якое з'яўляецца падмуркам двухбаковых сувязяў, і афіцыйны візіт беларускай дэлегацыі ў лацінаамерыканскую краіну. Пра планы наведаць Эквадор сёлета сёння паведаміў Аляксандр Лукашэнка. Курс на збліжэнне ўзаемны, гэта неаднаразова падкрэслівалі на сустрэчы. Нягледзячы на тысячы кіламетраў, якія падзяляюць Беларусь і Эквадор, у краін шмат агульнага: інтарэсы і пазіцыі на міжнароднай арэне, увага да сацыяльных пытанняў, а таксама напрацоўкі ў гандлёва-эканамічнай сферы. Абноўленыя лічбы тавараабароту і новыя праекты перад візітам - усе падрабязнасці ў рэпартажы Ілоны Красуцкай.
Гэтую вуліцу ўжо даўно трэба пераназваць у Эквадорскую. Найбуйнейшы імпарцёр садавіны ў Беларусі 15 гадоў корміць усю краіну паўднёваамерыканскімі бананамі. Штотыдзень пастаўкі сотнямі тон. І гэта нягледзячы на адлегласць 11 000 кіламетраў. Месяц марской і сухапутнай транспартоўкі - і садавіна на складзе пад Мінскам. Дзякуючы мікраклімату і працэсу газацыі на пяты дзень пасля адгрузкі яны выходзяць са спячкі. Зялёныя бананы набываюць таварны выгляд.
Краіна на экватары - нумар адзін у свеце ў пастаўках бананаў. Любяць гэты фрукт і самі жыхары паўднёваамерыканскай Швейцарыі. Паводле падлікаў, кожны эквадорац з'ядае за год амаль 74 кілаграмы жоўта-зялёных. А вось беларус удвая менш.
Зрэшты, не адзіным гастранамічным інтарэсам. Беларусь і Эквадор ужо даўно злучае цяжкавагавое супрацоўніцтва. Нафтаздабыча, геолагаразведка і будаўніцтва: гэтыя праекты - вынік трох сустрэч на вышэйшым узроўні.
Чэрвень 2012. Беларуская дэлегацыя на чале з Прэзідэнтам прыбывае ў Кіта - эквадорскую сталіцу і другі па велічыні горад паўднёваамерыканскай рэспублікі. Першы ў гісторыі афіцыйны візіт пачынае новую старонку ў двухбаковых адносінах. Бакі дамаўляюцца аб стварэнні камісіі па гандлёва-эканамічным супрацоўніцтве, падпісваюць некалькі дакументаў аб узаемадзеянні ў сферы адукацыі, навукі, тэхналогій і інавацый. Тады ж Рафаэль Карэа атрымаў запрашэнне ад Аляксандра Лукашэнкі прыехаць у Беларусь і самому ўпэўніцца ў яе магчымасцях.
Запрашэнне было прынятае, і праз крыху больш як год эквадорскі лідар добрасумленна выканаў абяцанне. У інтэр'ерах Палаца Незалежнасці палітыкі ўпершыню гаварылі аб развіцці двухбаковых гандлёва-эканамічных адносін.
Іх апошні дыялог адбыўся ўсяго паўгода назад. Падчас Генасамблеі ААН абодва лідары сустрэліся ў Нью-Ёрку і пацвердзілі свае сур'ёзныя намеры ў супрацоўніцтве. Тады дамовіліся прэзідэнты і пра неабходнасць паўторнага візіту Аляксандра Лукашэнкі ў Эквадор.
Частата візітаў на вышэйшым узроўні вызначыла дынаміку ў адносінах абедзвюх краін. Таму заканамерна, што дэлегацыі Эквадора - заўсёды жаданыя госці ў Беларусі. І сёння адзін з прыёмаў. Аляксандр Лукашэнка сустракаецца з кіраўніком парламента Эквадора Габрыэлай Рывадэнейрай.
Падчас гутаркі Кіраўнік дзяржавы анансуе свой наступны візіт у Эквадор. Інтарэсы абедзвюх краін сходзяцца, пазіцыі супадаюць і на міжнароднай арэне, што ж датычыцца эканамічнага супрацоўніцтва, то яно пакуль не адпавядае патэнцыялу дзвюх краін. Нягледзячы на тое што за апошнія некалькі гадоў узаемны тавараабарот падвоіўся - у 2015 склаў каля 80 мільёнаў долараў, - для дасягнення абноўленай лічбы сёлета краіны рэалізуюць некалькі маштабных праектаў.
Габрыэла Рывадэнейра - адна з самых папулярных палітыкаў Эквадора. У сямнаццаць гадоў атрымала тытул каралевы прыгажосці. Гэтая перамога прынесла шырокую вядомасць і дазволіла ёй дамагчыся поспеху ў мясцовай палітыцы. У 21 Рывадэнейра ўжо саветнік мэра горада Атавала, яшчэ праз колькі гадоў яго намеснік. А неўзабаве заняла пасаду губернатара адной з правінцый на поўначы Эквадора. У 2013 кіраванне парламентам перайшло ў яе жаночыя рукі.
Гаворачы пра Рывадэнейру ў адным са сваіх выступленняў, Рафаэль Карэа не выключыў, што ў будучыні яна можа стаць прэзідэнтам Эквадора або, прынамсі, кандыдатам на гэтую пасаду. Выбары ў краіне пройдуць ужо ў наступным годзе. Але, відавочна, без удзелу Рывадэнейры. Хоць пра жаночы ўзрост публічна гаварыць не прынята, ёй будзе толькі 33, а ўзроставы цэнз для кандыдата - 35. Зрэшты, і без высокай пасады ёй удаецца вырашаць самыя складаныя дзяржаўныя задачы.
Першае нафтавае радовішча ў даліне Амазоніі было вынайдзенае больш як 50 гадоў таму. Сёння продаж чорнага золата - адна з асноўных крыніц экспарту Эквадора. Праекты ў сферы разведкі і нафтаздабычы завуць дадатным прыкладам супрацоўніцтва паміж краінамі.
За права працаваць на радовішчах Эквадора змагаюцца шматлікія замежныя кампаніі. Але дзякуючы сусветнай рэпутацыі надзейнага партнёра сёння нам паступае чарада прапаноў аб альянсе. Зразумела, на беларускіх умовах. Лацінаамерыканская дзяржава, якая валодае незлічонымі падземнымі багаццямі, прапанавала Беларусі супрацоўніцтва ў правядзенні геолагавыведных работ і здабычы карысных выкапняў.
Сёлета беларускія спецыялісты пачнуць свідраванне трох свідравін у Эквадоры і пабудуюць інфраструктуру для здачы нафты. Пікавая здабыча на радовішчы чакаецца ў межах 250 000 тон чорнага золата за год. Што датычыцца геолагавыведных работ, патэнцыял аднаго з блокаў ацэньваюць на амаль восем мільёнаў тон нафты. Так, Эквадор багаты карыснымі выкапнямі. Але краіне не хапае тэхналогій і чалавечага капіталу. Беларусь дапаможа наладзіць вытворчасць прадукцыі з высокай дададзенай вартасцю і здзейсніць рэвалюцыю ў тэхналагічным і вытворчым вымярэнні.
Наша краіна зоймецца і падрыхтоўкай адпаведных кадраў для лацінаамерыканскага рэгіёна. Сёння вышэйшую адукацыю ў Беларусі атрымліваюць каля паўсотні студэнтаў з Эквадора. Шматлікія з іх у якасці альма-матар выбралі Акадэмію кіравання пры Прэзідэнце.
Дарэчы, лекцыю на тэму сучаснага парламентарызму сёння тут прачытала і Габрыэла Рывадэнейра. А хутка яшчэ адзін крок на збліжэнне: краіны маюць намер узаемна прызнаваць дыпломы аб вышэйшай адукацыі.
Габрыэла Рывадэнейра, старшыня Нацыянальнай асамблеі Эквадора: "Мы ведаем пра тое, што той узровень адукацыі і падрыхтоўкі спецыялістаў, які даецца ў Акадэміі кіравання пры Прэзідэнце Беларусі, - гэта самы высокі ўзровень. Акадэмія вядомая ў шматлікіх краінах, у тым ліку ў еўрапейскіх. І нам цікава ўстанавіць цесныя сувязі ў сферы дзяржаўнага кіравання паміж нашымі краінамі".
Апроч вяршэнства ў парламенце Эквадора, Габрыэла Рывадэнейра таксама займае пасаду старшыні лацінаамерыканскага парламента - парлатына, які аб'ядноўвае 23 дзяржавы. Разам краіны ўдасканальваюць заканадаўствы ў сферах адукацыі, аховы здароўя і барацьбы з наркабізнесам. З гэтага часу Беларусь атрымлівае статус назіральніка ў гэтай міжпарламенцкай арганізацыі. На сустрэчы са сваімі калегамі Міхаілам Мясніковічам і Уладзімірам Андрэйчанкам спадарыня спікер завізавала два пагадненні аб супрацоўніцтве.
Габрыэла Рывадэнейра, старшыня Нацыянальнай асамблеі Эквадора: "На сёння ў працэсе падрыхтоўкі знаходзяцца адразу 6 праектаў паміж нашымі краінамі. У сферы гандлю, сельскай гаспадаркі, а таксама ў галіне адукацыі, навукі і тэхналогій".
Мінск. Плошча Перамогі. Менавіта адгэтуль пачынаюцца візіты высокіх гасцей. Хвіліна маўчання і кветкі ля манумента ў знак падзякі за подзвіг, роўны цане ўласнага жыцця, подзвіг, без якога не было б цяперашніх шматмільённых кантрактаў і дружалюбных сувязяў паміж краінамі, якія выбралі мірны шлях.
Кантакты з Эквадорам для Беларусі - прыклад новай якасці сувязяў з рэгіёнам Лацінскай Амерыкі. У партнёрах ужо шэраг краін, якія іграюць на кантыненце галоўныя ролі: магутная Бразілія, перспектыўныя Венесуэла і Куба. Зараз яшчэ адна пляцоўка. Бо структура эканомікі Эквадора ў значнай ступені падобная да венесуэльскай, што гаворыць пра высокі патэнцыял двухбаковых адносін. Вынікі іх дзякуючы актыўнаму палітычнаму дыялогу хутка адчуюць не толькі бізнес, але і буйныя дзяржпрадпрыемствы. Візіт Аляксандра Лукашэнкі ў Эквадор запланаваны на другую палову года.
