Ад унутраных пытанняў да знешняй палітыкі. Сёння ў Палацы Незалежнасці гаварылі і аб беларуска-турэцкіх адносінах. Аляксандр Лукашэнка бачыць добрыя перспектывы для развіцця гандлю з Турцыяй.
Гэта Прэзідэнт агучыў падчас сустрэчы з старшынёй Вялікага нацыянальнага сходу гэтай краіны. Дэлегацыя парламентарыяў на чале са спікерам знаходзіцца з двухдзённым візітам у Беларусі. Біналі Йылдырым раней займаў пасаду прэм'ер-міністра і ў гэтым статусе ўжо быў у Мінску, а таму ў цэнтры ўвагі былі першым чынам эканамічныя пытанні. Узаемавыгадны гандаль стане добрай запамогай для краін. Цікавасць у самых розных сферах - ад лагістыкі да турызму. У нашай краіне зарэгістравана больш як 300 прадпрыемстваў з удзелам турэцкага капіталу.
З партнёрамі з гэтай краіны абмяркоўваецца пытанне па стварэнні зборачных вытворчасцяў камбайнаў, будаўнічай і спецыяльнай тэхнікі "Амкадар", таксама вядуць перамовы аб пастаўках на рынак Турцыі беларускіх БелАЗаў.
Тавараабарот паміж краінамі паказвае рост - гэты пазітыўны трэнд трымаецца на працягу апошніх некалькіх гадоў. Сума агульнага гандлю за няпоўны 2018-ы перавысіла 700 мільёнаў долараў. У выніку разлічваюць на мільярд.
Спікер перадаў Кіраўніку беларускай дзяржавы Аляксандру Лукашэнку прывітанне ад яго калегі Рэджэпа Тайіпа Эрдагана. Беларусь і Турцыя падтрымліваюць дыялог на вышэйшым узроўні. Нагадаем, два гады таму Прэзідэнт гэтай краіны прыязджаў у Мінск. А ў наступным годзе з візітам у Турцыі чакаюць беларускага лідара. Плануецца абмеркаваць і прыняць шэраг важных рашэнняў у пытаннях двухбаковага супрацоўніцтва.
