Аляксандр Лукашэнка накіраваўся з рабочым візітам у Кыргызстан

Прэзідэнт Беларусі накіраваўся з рабочым візітам у Кыргызстан. Там Аляксандр Лукашэнка возьме ўдзел у саміце Арганізацыі Дагавора аб калектыўнай бяспецы. Самалёт Кіраўніка дзяржавы вылецеў з Нацыянальнага аэрапорта Мінск прыкладна гадзіну таму.

Традыцыйна на палях саміту Кіраўнік беларускай дзяржавы правядзе сустрэчы і перамовы з замежнымі калегамі. Гэта яшчэ і добрая магчымасць ацаніць развіццё двухбаковых адносін. Так, напрыклад, за 2018 год тавараабарот Беларусі і Кыргызстана склаў 130 мільёнаў долараў ЗША. Аснова нашага экспарту - малочныя прадукты, лекі, мяса і будаўнічыя вырабы. Імпарт - бавоўна, садавіна і запчасткі для агратэхнікі. 

Сесія Савета калектыўнай бяспекі АДКБ пройдзе ў Бішкеку 28 лістапада

Таксама 28 лістапада Аляксандр Лукашэнка падчас сесіі Савета калектыўнай бяспекі АДКБ пазначыць пазіцыю і асноўныя прапановы Беларусі па развіцці і ўмацаванні матрыцы міжнароднай бяспекі. Чакаецца на парадку дня і абмеркаванне праблем таджыка-афганскай мяжы, сумесная праца з ААН, а менавіта ўзаемадзеянне ў рамках глабальнай антытэрарыстычнай стратэгіі, і пытанні інфармацыйнай бяспекі. Па выніках саміту будуць падпісаныя розныя дакументы. Яны павінны палепшыць узаемадзеянне краін - членаў АДКБ.