Сяброўства двух лідараў і шчыры палітычны дыялог падмацоўваюцца і рэальнай эканомікай. Ключавы сумесны праект - Гарлыкскі горна-ўзбагачальны калійны камбінат. Яго беларусы будуюць пад ключ. У Ашхабадзе працуе наша здымачная група.
Рэпартаж Сяргея Хамянтоўскага.
Яны дамовіліся, што будуць бачыцца штогод. Дамоўленасці прытрымліваюцца, каб своечасова праводзіць рэвізію сумесных праектаў. Пасля паездкі Гурбангулы Бердымухамедава ў красавіку мінулага года ў Мінск Аляксандр Лукашэнка з візітам у адказ марудзіць не стаў.
Вечарам борт Аляксандра Лукашэнкі сеў у аэрапорце Ашхабада. Высокага госця каля трапа сустракаюць па-ўсходняму гасцінна.
Вылецеўшы раніцай з Мінска, беларуская дэлегацыя ў Ашхабадзе часу не марнавала. Першымі сустрэчы правялі прадстаўнікі эканамічнага блока.
Перагаворную эстафету падтрымалі міністры замежных спраў.
За апошнія 5 гадоў тавараабарот павялічыўся ў 5 разоў пры станоўчым сальда для Беларусі. Сяброўства двух лідараў падмацоўваецца рэальнай эканомікай. Гандаль перавысіў 300 мільёнаў долараў. Прэзідэнты задаволеныя. Але абмеркаваць ёсць што. Гэта павелічэнне паставак беларускіх машын і тэхналогій. Пераход Туркменістана ад сыравіннай эканомікі да інавацыйнай Беларусь гатовая падтрымаць.
Галоўнае - закладзены калійны падмурак будучага ўзаемадзеяння. Беларусь пад ключ будуе Гарлыкскі горна- ўзбагачальны камбінат. Чакаецца, што чырвоную стужку на адкрыцці камбіната прэзідэнты перарэжуць у пачатку 2015 года. Беларусь, дарэчы, рыхтуе і кадры для будучай калійнай вытворчасці.
Заўтра - галоўны дзень перамоў. Прэзідэнты сустрэнуцца сам-насам і ў прысутнасці міністраў. Чакаецца падпісанне пакета двухбаковых дакументаў.
Будзе падчас візіту і час для гістарычнай памяці. Плануецца, што заўтра пасля афіцыйных перамоў у Ашхабадзе Аляксандр Лукашэнка адправіцца ў Кіпчак, родавае паселішча першага Прэзідэнта Туркменістана. Кіраўнік дзяржавы наведае маўзалей Сапармурата Ніязава.
Завершыцца візіт у Ашхабадзе ўрачыстай цырымоніяй каля манумента Канстытуцыі Туркменістана. Аляксандр Лукашэнка пасадзіць дрэва на Алеі Ганаровых гасцей.
