Абмяркоўваць складаныя пытанні архітэктуры бяспекі ў рэгіёне і свеце ў Мінск прыехалі больш як сто аўтарытэтных палітыкаў: кіраўнікі дзяржаў і ўрадаў, міністры замежных спраў некалькіх еўрапейскіх краін, кіраўнікі міжнародных арганізацый і эксперты. У адкрыцці міжнароднага форуму і дыскусійнай сесіі "Адносіны Усход - Захад" прыме ўдзел Прэзідэнт Беларусі Аляксандр Лукашэнка.
У Палацы Незалежнасці, дзе пройдзе асноўная дыскусія, ужо працуе наш аглядальнік Наталля Брэвус.
Хачу сказаць, што ўражвае не столькі колькасць удзельнікаў, колькі ўзровень прадстаўніцтва на гэтым форуме. Гэта кіраўнікі дзяржаў, як вы ведаеце, прыехаў прэзідэнт Арменіі, прэм'еры Малдовы, Сербіі, міністры замежных спраў Польшчы, Македоніі, Славеніі, Манголіі, Генеральны Сакратар АБСЕ, еўракамісар Хан. Гэта далёка не поўны спіс топавых персон. Але вось што ўжо не здзіўляе, дык гэта тое, што пра бяспеку гавораць менавіта на мінскай пляцоўцы.
Усё часцей беларуская сталіца становіцца платформай, дзе зручна выказваць розныя пункты погляду. Выбар Мінска - гэта, па сутнасці, прызнанне сусветнай супольнасцю ўкладу Беларусі ва ўмацаванне стабільнасці і спакою ў рэгіёне. Высілкі па садзейнічанні міру ацанілі. А ў такім фармаце пытанні бяспекі раней абмяркоўвалі ў буйных геапалітычных цэнтрах, напрыклад, у Вашынгтоне, Пекіне, Вене, Нью-Дэлі. Эксперты ва ўсім свеце гавораць аб тым, што жывем у няпросты час. Страчаны давер. Чаго не было, мабыць, з часоў халоднай вайны. Гэта не песімізм, а хутчэй, рэальны погляд на тое, што адбываецца на планеце. Патрэбен дыялог. Чаму Беларусь усяляк спрыяе. Дарэчы, калі гаварыць пра давер, то і з Захаду, і з Усходу з даверам ставяцца да нашай краіны. Павагу выклікае пазіцыя афіцыйнага Мінска. Яна ў простым: як бы ні было цяжка, якія б супярэчнасці ні існавалі паміж краінамі, трэба адкінуць усё і дамаўляцца. На гэта зважалі ўдзельнікі форуму.
Ана Брнабіч, прэм'ер-міністр Сербіі: "У мяне вялікія чаканні ад цяперашняй канферэнцыі. Я вельмі рада быць тут. Гэта мой першы візіт у Мінск. Наперадзе - сустрэчы на высокім узроўні! З Прэзідэнтам Беларусі Аляксандрам Лукашэнкам і з прэм'ер-міністрам вашай краіны. Я з нецярпеннем чакаю перамоў. Адзначым, што адносіны паміж Беларуссю і Сербіяй фантастычныя. У нас няма ніякіх супярэчлівых пытанняў. Я, дарэчы, маю намер перадаць Прэзідэнту Лукашэнку ліст ад лідара Сербіі Аляксандра Вучыча з запрашэннем наведаць нашу краіну. Ведаеце, я пачуваюся ў Мінску ў коле сяброў".
Мюнхенская канферэнцыя па бяспецы - адзін з найболей аўтарытэтных форумаў па гэтай тэме - праводзіцца штогод з 1963 года. Першапачаткова яна была пляцоўкай для нефармальных сустрэч вайскоўцаў і лідараў краін НАТА. З часам форум пачаў прыцягваць больш увагі прадстаўнікоў палітычных і ваенных колаў іншых краін. З 2009 праходзяць сустрэчы асноўнай групы Мюнхенскай канферэнцыі. Гэта працяг гутаркі. І шмат у чым менавіта на такіх сустрэчах задаюць тон наступнай дыскусіі. Традыцыйна фокусам увагі асноўнай групы з'яўляецца архітэктура бяспекі рэгіёна, у якім праводзіцца сустрэча.
Мінская прысвечаная ўзаемаадносінам па лініі Усход - Захад, таксама энергетычнай і транснацыянальнай бяспецы і мінскаму працэсу. З вялікай доляй верагоднасці будзе закрануты і эканамічны аспект - усё ж узмацняецца ў апошні час санкцыйная рыторыка. Не дае расслабіцца сусветнай супольнасці гонка ўзбраенняў, лакальныя канфлікты ў краінах постсавецкай прасторы. Гэта Украіна, карабахскі канфлікт. Сірыйская тэматыка застаецца актуальнай. Словам, усё, што ўплывае на сусветную архітэктуру бяспекі.
Беларусь не ўбаку ад глабальнай дыскусіі. Мінск выкарыстае форум, каб данесці свае погляды па тэме бяспекі. Гэта ўплывае на стаўленне да нашай краіны - яно змяняецца. Гэта адчуваецца ў апошні час. У той перыяд, калі свет не становіцца спакайнейшым, яшчэ больш каштуе настрой на мір і канструктыў нават у самых складаных геапалітычных пытаннях і бяспецы. Чакаем дыскусіі.
