На парадку дня 26 пытанняў. Адно з галоўных - бюджэт-2017. Ён запланаваны з прафіцытам на паўтара мільярда рублёў. Грошы пойдуць на пагашэнне дзярждоўгу, каб праз 5-6 гадоў крэдытная нагрузка не аказвала націску на эканоміку.
У першай палове дня дэпутаты ратыфікавалі Канвенцыю аб правах інвалідаў, рамачнае пагадненне паміж урадам Беларусі і Глабальным фондам для барацьбы са СНІДам, прагаласавалі за далучэнне Беларусі да чатырох пагадненняў у сферы мараплаўства, прынялі ў другім чытанні папраўкі ў закон аб ветэрынарнай дзейнасці. Апошняя сесія пятага склікання будзе нядоўгай: ужо ў пятніцу адбудзецца сумеснае пасяджэнне з парламентарыямі шостага склікання. А 11 кастрычніка ніжняя палата парламента пачне працу ў новым складзе.
