Ужо заўтра прымуць выніковы дакумент - мінскую дэкларацыю. Сёння ж працягваліся дыскусіі аб барацьбе з экстрэмізмам, пытаннях дыскрымінацыі і рэформах Парламенцкай асамблеі.
Найбольшыя спрэчкі і рознагалоссі выклікаў праект рэзалюцыі "Аб сітуацыі ва Усходняй Еўропе". Там змяшчаецца ў тым ліку крытыка ў адрас Азербайджана, Расіі, Беларусі. Аўтар - прадстаўнік шведскага дэпутацкага корпуса. Па некаторых папраўках дакумента еўрапарламентарыям нават прыходзілася галасаваць некалькі разоў - альбо праз роўны падзел галасоў за і супраць, альбо праз некарэктнасць вядзення падліку. І ўсё ж дакумент адобрылі. Беларуская дэлегацыя лічыць яго неканструктыўным. Як заявіў сёння віцэ-спікер Палаты прадстаўнікоў, падобныя рэзалюцыі не спрыяюць плённаму дыялогу і супрацоўніцтву ў рамках асамблеі.
Неканструктыўным і канфрантацыйным дакумент назвалі і ў Міністэрстве замежных спраў нашай краіны.
Беларусь паслядоўна выступае супраць падобных рэзалюцый, якія не нясуць ніякай дададзенай вартасці, выказаўся па выніках пасяджэння Дзмітрый Мірончык. "Яны не толькі не дапамагаюць краінам вырашаць якія б там ні былі ўнутраныя праблемы, але і вядуць да далейшага росту напружанасці, паглыблення недаверу ў адносінах паміж дзяржавамі".
Тым часам Беларусь сёння чарговы раз пацвердзіла, што нацэленая, у першую чаргу, на ўмацаванне ўзаемнага даверу і супрацоўніцтва ў імя міру ў рэгіёне. Нашы парламентарыі выступілі за аб'яднанне міжнародных высілкаў у гэтым пытанні і падтрымалі рэзалюцыю Расіі аб барацьбе з тэрарызмам. Праект адобрылі большасцю галасоў. Не абышлі ўвагай і пытанні эканомікі. Сёння ў Парламенцкай асамблеі АБСЕ стварылі групу падтрымкі "Шаўковага шляху". Заснавальнікамі выступілі 17 краін - у тым ліку Беларусь. Асноўная задача - спрыянне развіццю транспартных калідораў, спрашчэнне працэдур гандлю і перавозак, вольнае перамяшчэнне асоб. На парадку дня былі і кадравыя пытанні. Абраны новы кіраўнік камітэта па палітычных пытаннях і бяспецы. Ім стаў кіраўнік дэлегацыі Швейцарыі. Філіпа Ламбардзі ўпэўнены: Мінск - добрая пляцоўка для рашэння важных пытанняў.
