Мінск гатовы забяспечыць усе ўмовы для правядзення сустрэчы кіраўнікоў МЗС "нармандскай чацвёркі", калі ўдзельнікі перагаворнага працэсу аб такой сустрэчы дамовяцца, - паведамляе прэс-служба знешнепалітычнага ведамства Беларусі. Некалькі гадзін таму міністр замежных спраў Германіі Франк-Вальтэр Штайнмаер заявіў, што ён сумесна з французскім калегам Жан-Маркам Эйро прапанаваў кіраўнікам МЗС Украіны і Расіі зноў сабрацца ў беларускай сталіцы. Паводле слоў Штайнмаера, неабходнасць правесці перамовы выкліканая пагаршэннем сітуацыі ў Данбасе.
Становішча на ўсходзе Украіны сёння ў Мінску абмяркоўвае і трохбаковая кантактная група. Пасяджэнне традыцыйна праходзіць у закрытым рэжыме.
З хвіліны на хвіліну ў "Прэзідэнт-гатэлі" пачнецца прэс-канферэнцыя спецпрадстаўніка АБСЕ Марціна Сайдзіка, які распавядзе аб выніках пасяджэння.
