Мінск і далей мае намер працягваць працу па арганізацыі маштабнага дыялогу, які паспрыяе ўмацаванню стабільнасці ў еўрапейскім рэгіёне. Пра гэта пры падвядзенні вынікаў сустрэчы асноўнай групы Мюнхенскай канферэнцыі па бяспецы заявіў кіраўнік МЗС Беларусі.
Уладзімір Макей, Міністр замежных спраў Беларусі: "Тое, што словы "дыялог", "кампраміс", "партнёрства" гучалі вельмі часта падчас дыскусій, гэта пра многае гаворыць. У прыватнасці, пра тое, што прапановы Мінска аб неабходнасці ўдасканалення наяўнай архітэктуры бяспекі праз умацаванне маштабнага дыялогу былі слушнымі".
Акрамя таго, Уладзімір Макей дадаў, што Беларусь прыкладзе максімум высілкаў для вырашэння канфлікту ў Данбасе, і адзначыў пры гэтым важнасць выразнага разумення наяўнасці палітычнай волі для ўрэгулявання сітуацыі на ўсходзе Украіны.
