Адукацыйна-аздараўленчы цэнтр "Зубраня" запускае маштабны творчы конкурс да свайго 50-гадовага юбілею.
Сваімі ўспамінамі, асабістымі гісторыямі, фатаграфіямі, звязанымі з адпачынкам у лагеры ў розныя гады, можна падзяліцца ў электронным лісце. Заяўкі можна дасылаць на скрыню, якая ўказана на афіцыйным сайце цэнтра. Аўтараў лепшых гісторый запросяць на ўрачысты дзень нараджэння, які адбудзецца 17 жніўня на беразе возера Нарач. Юбілей цэнтра "Зубраня" стане яркай падзеяй лета-2019 Мінскай вобласці. На свята чакаюць шмат гасцей. Зараз абмяркоўваецца дакладная праграма. Створаны арганізацыйны камітэт па падрыхтоўцы да мерапрыемства.
Штогод у Нацыянальным адукацыйна-аздараўленчым цэнтры "Зубраня" адпачываюць каля 16 тысяч дзяцей. За 50 гадоў у цэнтры пабывалі хлопчыкі і дзяўчынкі больш чым з 45 краін свету. "Зубраня" - адзін з буйнейшых дзіцячых цэнтраў на постсавецкай прасторы пасля "Артэка" і "Арлёнка".
