Збор лекавых і дэкаратыўных раслін, фітадызайн і майстар-клас па ландшафце. Зімовы ўніверсітэт для кветкаводаў працуе у Батанічным садзе. У выхадныя навуковыя работнікі правядуць шэраг лекцый для садаводаў і кветкаводаў. Якая праграма чакае наведвальнікаў
“Паўлінка”, “Несцерка”, “Мінчанка” - Наталля Македонская з пяшчотай пералічвае віды бэзу сталічнага батанічнага сада. Развядзеннем духмяных суквеццяў навуковы супрацоўнік займаецца амаль 30 гадоў. Яе калекцыя ўнесена ў дзяржаўны рэестр аховы раслін. Сваімі ведамі вопытны кветкавод ахвотна дзеліцца з аматарамі падчас традыцыйных майстар-класаў. Чарговы, бэзавы, пройдзе ў гэтую суботу, у аранжарэі.
Ландшафтныя дызайнеры і кветкаводы пазнаёмяць удзельнікаў так званых “зялёных” урокаў з новымі відамі дэкаратыўных раслін, кустоў і дрэў, а таксама дадуць рэкамендацыі па іх вырошчванні. А пасля лекцый - экскурсія па аранжарэі. Зараз – час цвіцення многіх субтрапічных раслін: гузманій, эхмей, камелій.
Сам жа батанічны сад круглы год – аазіс прыгажосці. Вось і цяпер, у лютым, з-пад заснежаных кронаў, нібы тыя пралескі, віднеюцца кветкі гамамеліса японскага. Убачыць такі цуд можна ў сектары Усходняй Азіі, недалёка ад Чаромхавай алеі. Калі крыху пацяплее, пупышкі ператворацца ў жоўтае суквецце.
Заняткі ў міні-ўніверсітэце для кветкаводаў-аматараў працягнуцца да пачатку сакавіка. У суботнім раскладзе - лекцыі па вырошчванні буйнаплодных буякоў, правілах фітадызайну, зборы лекавых раслін, кветкавым афармленні альпійскіх горак.
21 лютага Батанічны сад узгадае традыцыі праводзін зімы. Развітацца з маразамі і пакаштаваць масленічных бліноў можна будзе падчас святочнай праграмы. На пляцоўцы ля аранжарэі наведвальнікаў чакаюць выступленні цыганскіх калектываў, фаер-шоу і, традыцыйна, падпальванне чучала.
