Нацыянальныя беларускія традыцыі ў сучасным прачытанні. Вілейскі краязнаўчы музей прапануе новыя праекты для дзяцей і моладзі з квізамі, тэстамі і квестамі. Тут жа і майстар-класы па стварэнні лялек, якія для нашых продкаў былі абярэгамі. А ў больш традыцыйным фармаце выстава лялек, што родам з СССР.
Пра папаўненне музейных экспазіцый - Ларыса Гулякевіч.
Асоба, апантаная сваёй прафесіяй, музейнай справай. Надзея Аўдзей, дырэктар Вілейскага краязнаўчага, лічыць, што музей – гэта не толькі экспазіцыйная прастора, а жывы арганізм, які развіваецца разам з часам. Музейныя заняткі па гісторыі роднага краю для школьнікаў праводзіць выключна ў вілейскім народным касцюме.
На майстар-класах дзяцей вучаць рабіць лялькі–матанкі, народныя абярэгі. Тым самым знаёмяць іх з самабытным і старажытным рамяством, з традыцыямі бабуль і прабабуль.
Экскурсіі па часе ў Вілейскім краязнаўчым музеі праводзяць у форме квесту
Дзеці і дарослыя павінны ўспомніць, колькі рэспублік было ў СССР, як выглядаюць іх народныя касцюмы, адгадаць назвы і прозвішчы герояў савецкіх фільмаў і мультфільмаў.
Назад у СССР. Тут сабраны лялькі ад 40-х да 90-х гадоў мінулага стагоддзя па розных тэмах. Вось, напрыклад, тэма вяселля. Такую ляльку-нарачоную саджалі на капот аўтамабіля. Мода гэта заставалася да 2000 гадоў. Галоўны герой Савецкага Саюза быў працоўны чалавек, гэтай тэматыцы прысвечана секцыя. Вось такая лялька вытворчасці ГДР была ў мяне ў дзяцінстве, толькі ў іншым адзенні. А вось з такога пакета малака мая бабуля рабіла кармушкі для птушак зімой.
Ёсць тут і пастаянныя краязнаўчыя экспазіцыі, якія рэгулярна папаўняюцца новымі экспанатамі. Нядаўна музей атрымаў рарытэтную маляванку – распісаны ў адпаведнай тэхніцы дыван.
Каб заахвоціць моладзь вывучаць аўтэнтычныя экспанаты і сваю гісторыю, у Вілейскім краязнаўчым музеі запускаюць праект "Тэрыторыя YOUTH". Займальныя квізы і падарожжы па часе арганізуюць у тым ліку і на анлайн-гульнявых пляцоўках.
