Беларусь рыхтуецца да маштабных святкаванняў. Напярэдадні Дня Незалежнасці па ўсёй краіне праходзяць урачыстыя сустрэчы і выставы. Кнігу "Ніколі не забудзем", напісаную школьнікамі, прэзентавалі ў Нацыянальнай бібліятэцы. Тут сем дзясяткаў гісторый, эсэ, нарысаў і вершаў, якія змясціліся ў сем з паловай гадзін - ёсць і аўдыёверсія.
Аб страшных падзеях вайны і ўспамінах герояў - Ксенія Рабчынская. Бацькі Георгія Гур'ева ў сямейным альбоме захоўваюць успаміны дзядуляў і прадзядуляў. Там жа хлопчык знайшоў і франтавыя занатоўкі ветэрана Сямёна Гур'ева - пажоўклыя лісткі - аб страшных днях жніўня 41-га. Праз 7 дзясяткаў гадоў пасля Дня Перамогі яго праўнук напісаў аповед, які ўвайшоў у зборнік "Ніколі не забудзем. Унукі аб вайне".
Кнігу прэзентавалі ў Нацыянальнай бібліятэцы - усе аповеды, нарысы і эсэ, апублікаваныя ў зборніку, прайшлі строгі адбор: нацыянальны конкурс быў аб'яўлены ў верасні мінулага года. На працягу чатырох месяцаў прайшло тры этапы: раённы, абласны і фінал.
Усяго ў фінал конкурсу выйшла больш за сем сотняў прац з усіх рэгіёнаў краіны. Самым дарослым удзельнікам конкурсу споўнілася 14, самыя маленькія - гэта першакласнікі. І ў выніку ў кнізе на 250 старонках апублікавана 32 аповеды і два дзясяткі вершаў. І гэта далёка не ўсё.
Тут жа і эсэ, і нарысы, і нават інтэрв'ю са сведкамі той страшнай вайны - усяго 73 работы. Конкурс аб'явілі беларускія піянеры, а паўдзельнічаць мог кожны.
І зараз гэтыя гісторыі, да сённяшняга дня не расказаныя, сабраныя ўсе разам. А спецыяльна для таго, каб кніга была даступнай для ўсіх, прэзентавалі і аўдыёверсію. Над ёй працавалі прафесіяналы канала "Культура" беларускага радыё.
У выніку ўсе да адзінага аповеда і вершы змясціліся ў сем з паловай гадзін - некаторыя з іх прагучаць у эфіры канала "Культура" ў Дзень Незалежнасці Беларусі. На прэзентацыі і аўдыёкніжку, і друкаваную версію атрымалі ў падарунак і ветэраны.
І менавіта для таго, каб перадаць гэтую памяць будучым пакаленням, сёння прабабулі і прадзядулі свае гісторыі распавядаюць нам вуснамі ўнукаў.
