Час гаджэтаў літаратуры не перашкода. У Мінску з аншлагам праходзіць міжнародная кніжная выстава.
Рэкордныя 3 000 квадратных метраў выставачнага комплексу "Белэкспа" занялі толькі кнігі з 31 краіны свету. Грэцыя ўпершыню паказала сваё друкаванае слова ў сталіцы, а ганаровым госцем сёлета стала Вялікабрытанія. Праграма форуму насычаная - больш за 300 прэзентацый, сімпозіум пісьменнікаў і аўтограф-сесіі. Сёння гасцей выставы чакаюць сустрэчы з пісьменнікамі і майстар-клас па кнігадрукаванні на друкарскім станку, які зроблены паводле эскізаў XVI стагоддзя. Менавіта на такім, як кажуць эксперты, працаваў Францыск Скарына.
Лілія Ананіч, Міністр інфармацыі Беларусі: "500 гадоў таму менавіта на беларускай мове выйшла першая друкаваная кніга - гэта была падзея для той эпохі, для таго часу. Але мы і сёння на постсавецкай прасторы адны з лепшых выдаўцоў. Кніга аб'ядноўвае, і кніга - гэта наша мінулае, наша сучаснасць і наша будучыня. Гэта духоўнае завяшчанне тым, хто будзе пасля нас, і гэта ўмовы канкурэнцыі. Сёння кніга - гэта веданне. Нездарма больш за 50% кніг, якія выдаюцца ў краіне, - кніга навучальная".
Мерле Сафі Варнеке, аташэ аддзела культуры і прэсы пасольства Германіі ў Беларусі: "Мы ўжо больш як 20 гадоў прымаем удзел у гэтай міжнароднай кніжнай выставе ў Мінску. Сёлета мы прадстаўляем розныя кнігавыдаўніцтвы на нашым стэндзе. Ёсць кнігі, якія здзіўляюць, - гэта асаблівыя кнігі, якія можна адкрыць і ўбачыць аб'ёмныя малюначкі, гэтыя кнігі для людзей рознага ўзросту з веданнем нямецкай мовы і без".
Міжнародная кніжная выстава праходзіць у сталіцы 24-ы раз. Наведаць экспазіцыю можна будзе да канца тыдня.
