Па-першае, парушальнікаў унясуць у спецыяльную базу. Па-другое, ім забароняць уваход на спартыўныя мерапрыемствы. Спіс будзе ў адкрытым доступе ў Інтэрнэце. За такія змены сёння прагаласавалі дэпутаты. Яны прынялі папраўкі ў законы аб грамадскай бяспецы. Таксама парламентарыі прапаноўваюць узмацніць жорсткасць правілаў для гульняманаў і пускаць у казіно толькі з 21 года.
Усе падрабязнасці абмеркаванняў і змен - у Святланы Лук’янюк. Адміністрацыйная забарона на наведванне фізкультурна-масавых мерапрыемстваў. Пад такой фармулёўкай у законах - гарантыя парадку падчас гульняў на стадыёнах. Фанатаў-хуліганаў, у тым ліку і замежных, з гэтага часу будуць ведаць у твар. Прычым інфармацыя гэта не закрытая, а ў вольным доступе на прасторах Сусветнай павуціны.
Дэпутаты прагаласавалі за стварэнне ў Беларусі спісу балельшчыкаў, якім уваход на спаборніцтвы і гульні забаронены з-за хуліганскіх паводзін на такіх мерапрыемствах. Ужо сёння, дарэчы, у полі зроку праваахоўнікаў - 130 фанатаў, у асноўным футбольных.
Сярод тых, хто засвяціўся не ў лепшым выглядзе, - больш за ўсё са сталіцы і Мінскай вобласці. Усяго ж у краіне каля трох з паловай тысяч актыўных аматараў спартыўных баталій.
У Еўропе для тых, хто праштрафіўся, дзверы спартыўных пляцовак зачыняюць на тэрмін да 5 гадоў. У Расіі - да 7-мі. Прафілактыка для агрэсіўных балельшчыкаў дадасць працы і праваахоўнікам. Бо на матчы збіраюцца тысячы.
Вынік галасавання 100 за, 1 супраць. Ёсць і прапанова ад дэпутатаў - увесці ў Беларусі пашпарт балельшчыка. Па ім адразу відаць, хто праходзіць на стадыён. Такі вопыт ёсць у расіянаў. Гатова разгледзець пытанне і наша МУС. Дэпутацкую прапанову атрымала сёння і Міністэрства па падатках і зборах, наконт ігральнага бізнесу - павялічыць узроставы парог для аматараў рызыкоўных гульняў на грошы.
Такую папраўку дэпутаты чакаюць да другога чытання Грамадзянска-працэсуальнага кодэкса. Сёння ў першым яны падтрымалі права сваякоў звярнуцца ў суд з заявай не пускаць сямейнага гульнямана ў клубы.
Сярод тых, хто сам сабе ўжо забараніў уваход у казіно, - 38 тысяч беларусаў. І зразумела, гэта лічба не адлюстроўвае рэальнай карціны па колькасці залежных. Але ісці па прынцыпе суседзяў і закрываць ігральныя дамы ў Беларусі не плануюць, гавораць у падатковай, і лічаць нядрэнны прыбытак ад гэтага бізнесу.
Павышаны кантроль і за праявамі тэрору. Пад асаблівай увагай у Беларусі - больш як 800 важных аб'ектаў сацыяльнай, вытворчай, інжынерна-транспартнай, энергетычнай і інфармацыйна-камунікацыйнай інфраструктуры. Змены зведалі і артыкулы па фінансаванні баевікоў.
Камітэт дзяржбяспекі становіцца нацыянальным кантактным цэнтрам, узаемадзейнічае з Камітэтам Савета Бяспекі ААН, у тым ліку па забаронах на ўезд у краіну міжнародных злачынцаў.
