. У 10-й сталічнай клінічнай бальніцы пасля рэканструкцыі адкрываецца аперацыйна-хірургічны блок. Памяшканне зараз цалкам адпавядае еўрапейскім стандартам, а гэта камфорт для ўрачоў і пацыентаў. Зараз тут можна будзе праводзіць найскладанейшыя аператыўныя ўмяшанні - да 30 працэдур за суткі. Антаніна Станкевіч, на шчасце, не ў якасці пацыента, ацаніла навіны.
Ужо праз некалькі дзён тут зноў будуць аперыраваць пацыентаў. А пакуль, перад адкрыццём пасля рэканструкцыі - невялікая экскурсія для нашай здымачнай групы. Змены пачаліся з перадаперацыйнага памяшкання - тут усё сканструявана такім чынам, што хірург перад аперацыяй можа ні да чаго не датыкацца. Што, дарэчы, адпавядае патрабаванням да правядзення любога хірургічнага ўмяшання.
У саміх аперацыйных - новае абсталяванне. Усталяваныя спецыяльныя відэакамеры, якія могуць у рэжыме рэальнага часу трансляваць ход аперацыі для кансіліума, напрыклад, або студэнтаў-медыкаў. Са столі свеціць зялёнае святло, якое дазваляе вачам хірургаў не стамляцца, нават за 16 гадзін бесперапыннай працы. Нават паветра ў памяшканні - і тое стэрыльнае.
Усяго рэканструявалі 11 аперацыйных памяшканняў. Зараз тут можна праводзіць да 30 працэдур за суткі.
Новае абсталяванне - гэта не толькі камфортныя ўмовы для працы ўрачоў. Галоўная задача - скараціць час правядзення аперацыі на 30-40%. У канчатковым выніку гэта ўплывае на хутчэйшае акрыянне пацыентаў.
Рэканструкцыя і ў рэанімацыйным аддзяленні. Сучасная тэхніка жыццезабеспячэння і новая сістэма абвесткі дазволіць аказаць хворым своечасовую дапамогу. І ўласна, дазволіць пацыентам не затрымоўвацца ў гэтым аддзяленні.
Сёння ў сталіцы надаюць вялікую ўвагу мадэрнізацыі ўсіх бальніц. Рэканструкцыя асноўных аддзяленняў праходзіць практычна ва ўсіх гарадскіх клініках, як дзіцячых, так і дарослых.
Дарэчы, мадэрнізацыя дазволіць яшчэ павялічыць экспарт паслуг. Напрыклад, толькі 10-я бальніца за мінулы год зарабіла больш чым 25 мільярдаў рублёў і паўмільёна долараў.
