Амаль у чвэрці правераных вадаёмаў рыба літаральна задыхаецца. Працэнт кіслароду - на пагранічных шасці міліграмах пры норме ўдвая большай. Калі лічба апусціцца да двух міліграмаў, рыба загіне. Адразу, як устанавілася спёка, эколагі ўзмацнілі кантроль за воднымі аб'ектамі. Дарэчы, кіслародны рэжым у водах залежыць як ад прыродных фактараў, так і ад чалавека.
Разам з эколагамі на праверку вадаёмаў адправілася Надзея Сербіненка.
Вераніка і Аляксандр - маладыя эколагі. Працаўнікі лабараторыі па кантролі якасці вады, за адзін дзень яны павінны праверыць адразу дзесяць вадаёмаў Пухавіцкага раёна. Кантрольныя заборы вады трэба праводзіць строга згодна з вызначанай схемай. У дапамогу эколагам - пераносны набор вымяральных прыбораў.
Пачынаецца праверка рачной вады з забору вады батометрам. Гідралагічны прыбор выкарыстоўваецца ў акіянаграфічных экспедыцыях. Ён не дапускае змешвання вады на розных глыбінях. Для далейшага аналізу патрэбна як мінімум невялікая каністра вады.
Узровень кіслароду - галоўны паказчык таго, наколькі рыбе камфортна ў вадзе. Замер выглядае прыкладна так: з сярэдзіны плыні ракі набіраецца поўнае вядзерца вады. Тут жа, на беразе ракі, спецыяльным прыборам, тэрмааксіметрам, вымяраем узровень кіслароду. Робім тэст. Як бачым, колькасць кіслароду - каля сямі. Такім чынам, рыбе тут жыць даволі камфортна.
Сем - гэта колькасць міліграмаў на кубічны дэцыметр. Калі канцэнтрацыя растворанага ў вадзе кіслароду менш за 6 міліграмаў, падводныя насельнікі адчуваюць сябе дрэнна. Два міліграмы на кубічны дэцыметр - і рыба гіне.
Дзеля справядлівасці варта адзначыць: масавага мору рыбы ў вадаёмах няма. Але спёка на працягу трох тыдняў не прайшла бясследна. Асабліва ў невялікіх вадаёмах, дзе вада стаіць. І рыбакі адзначаюць: улоў цяпер небагаты. Таму і водным турыстам з Мар'інай Горкі пакуль не вельмі шанцуе.
Пасля пробы вады з Пухавіцкага, Дзяржынскага і Стаўбцоўскага раёнаў накіроўваюцца ў сталічную лабараторыю. Тут вадкасць правяраюць на дзесяць розных паказчыкаў. Пасля хімікі выносяць вердыкт: вада бяспечная ці не.
Дарэчы, мор рыбы здараецца не толькі ў летнюю спёку. Узімку, калі ў вадзе недастаткова кіслароду, жыўнасць таксама гіне. Але пазбегнуць масавай гібелі рыб даволі складна. Усё, что можа чалавек, - гэта своечасова скошваць водныя расліны і не дапускаць забруджвання вадаёмаў.
