Цана на цыбулю-сявок за апошнія некалькі тыдняў вырасла ў 3 разы

Тэма, якую абмяркоўваюць літаральна ў кожным магазіне і прысядзібным участку. Цана на цыбулю-сявок. За апошнія некалькі тыдняў яна вырасла ў 3 разы, а дзесьці і зусім у 5! І складае 30 рублёў. Зрэшты, як упэўніваюць спецыялісты, панікаваць не варта. У чым прычына такой сітуацыі? І ці будзем з цыбуляй увосень - высвятляла Анастасія Бенедзісюк. 

Камароўскі рынак. Тут самы час ладзіць квэст па пошуку цыбулі-сяўка. "Не знойдзеце!" - упэўнівае Валянціна Цыганкова. Прынамсі, жоўтай. Апошнюю цыбуліну яна прадала яшчэ месяц таму. 12 рублёў за кілаграм. Ужо тады ўдвая вышэй за звычны цэннік. 

У цане зараз і не такі папулярны чырвоны сявок, гэты вырашчаны ў Казахстане. Ужо даўно няма на Камароўцы і насення цыбулі. 

Пакуль адны варожаць - чаму, іншыя прадаюць. Прылаўкі поўныя, цыбулі ў багацці. Сезонны кірмаш на Чкалава, 7. Попыт нараджае прапанову. Цэны растуць, а здымаць забараняецца. 

Зрэшты, такое павышэнне росту цэн на цыбулю - не што іншае, як магчымасць часткова кампенсаваць недахоп ураджаю. Толькі ў Нідэрландах (гэта асноўны наш імпарцёр) з-за засухі сёлета ён знізіўся на 44%. У Вялікабрытаніі цыбулі-сяўка сабралі менш на 40%, а ў Германіі - на 35. Сусветныя эканамічныя выданні пішуць аб цыбулі, якая падаражала ў Казахстане, Узбекістане, Таджыкістане, краінах Еўрасаюза. Пры такой сітуацыі прыходзіцца канкурыраваць ужо за закупы азіяцкай гародніны. 

Паміж тым, дэфіцыту сёння няма, попыт значна скараціўся. Перыяд пасадкі сяўка (канец красавіка - пачатак мая)  ужо ззаду. Пасля 15 чысла саджаць не рэкамендуецца. Паколькі цыбуля - культура доўгага дня, а гэта, распавядаюць навукоўцы-селекцыянеры, пагражае ёй быць вечна зялёнай. 

Свайго сяўка Беларусь сёння вырабляе ў невялікіх аб'ёмах. Айчыннага на рынку ўсяго працэнтаў 8. 

У цыбулі-сяўка ёсць адразу шэраг пераваг. Па-першае, каранёвая сістэма даволі моцная, а значыць - менш рызык пры дрэнным надвор'і. Па-другое, ураджай можна збіраць на месяц раней. І пры гэтым цыбуліна будзе куды больш буйнай. І па-трэцяе, і гэта для дачнікаў, бадай, самае галоўнае - ён просты пры пасадцы і доглядзе. 

Гэтую гародніну можна высаджваць і бліжэй да зімы, і там, упэўніваюць аграрыі, пытанняў быць не павінна. Страчаныя аб'ёмы скароцяць за кошт гэтага ўраджаю. Зрэшты, не варта забываць і аб насенні цыбулі - чарнушцы. Часцяком у вытворчых маштабах у гаспадарках і на фабрыках выкарыстоўваюць менавіта яе. 

Што датычыцца рэпчатай цыбулькі, то яе дастаткова для ўнутранага рынку, нягледзячы на тое, што ўраджай летась скараціўся на трэць. У стабілізацыйныя фонды заклалі амаль 12 тысяч тон, на пачатак мая яго засталася тысяча. І гэтага хопіць для бесперабойнага гандлю да новага ўраджаю, упэўніваюць спецыялісты. Улічваючы, што запасы ёсць і ў сховішчах сельгасарганізацый, ды і гандлёвыя сеткі завозяць, яшчэ і імпарт. 

Як адзначылі ў МАРГ: каб такая сітуацыя па ажыятажным попыце не паўтарылася, МАРГ сумесна з Мінсельгасхарчам падрыхтуюць дадатковыя меры абароны ўнутранага рынку. Тады і "гора цыбульнае" застанецца толькі іранічным выразам.