У сталіцы ёсць цудоўная традыцыя. Напярэдадні галоўнага веснавога свята жонка міністра замежных спраў Беларусі праводзіць сустрэчу з жонкамі кіраўнікоў дыпламатычных місій і прадстаўніцтваў міжнародных арганізацый. Кожны год - нязменна ярка і крэатыўна. На гэты раз месцам урачыстасцяў была выбрана Нацыянальная школа прыгажосці.
Як праходзіла святкаванне, а таксама што больш за ўсё запомнілася гасцям мерапрыемства, у рэпартажы Вольгі Давідовіч. Гэтыя прыгожыя дамы як ніхто іншы ведаюць, як ператварыць любое мерапрыемства ў дабрачыннае. Але сённяшняя сустрэча - выключэнне. Сёння - гледачы яны. У Нацыянальнай школе прыгажосці віншаванні прымаюць жонкі кіраўнікоў дыпламатычных місій, акрэдытаваных у Беларусі.
Месца сустрэчы выбрана не выпадкова. Кожны год жонка міністра замежных спраў нашай краіны імкнецца чымсьці здзівіць спрактыкаваных дам. У мінулым Вера Палякова-Макей запрашала жонак кіраўнікоў дыпламатычных місій у тэатр, на кандытарскую фабрыку - а сёлета было вырашана прадставіць беларускія модныя брэнды.
Для дам дыпламатычнага бамонду - модныя паказы. На подыуме ўборы для юных лэдзі і стыльныя рашэнні ад знакамітага беларускага дызайнера Івана Айплатава.
Жонкі кіраўнікоў знешнепалітычных ведамстваў абмяркоўвалі новыя тэндэнцыі ў адзенні, прычосках і макіяжы. Актыўна прымалі ўдзел у майстар-класах і пазіравалі перад камерамі.
Многія жонкі дыпламатаў добра знаёмыя і сустракаюцца ў нефармальным становішчы даволі часта. Да прыкладу, на сумесных дабрачынных вечарах Міжнароднага жаночага клуба. Ён існуе ў Мінску больш за 20 гадоў. Але былі тут і тыя, хто ў нашай краіне зусім нядаўна.
Жонкі дыпламатаў скарысталіся прысутнасцю нашай здымачнай групы і павіншавалі са святам усіх беларускіх жанчын.
