Эканомія рэсурсаў і інвестыцыя ў экалогію сталіцы. Семдзясят новых пунктаў па прыёме другаснай сыравіны адкрыюць у Мінску. У сталіцы ўжо ёсць амаль 200 такіх месцаў. За месяц з кожнага пункта на перапрацоўку адпраўляюць 100 тон пластыку, металу, паперы і шкла. Звычайныя сметнікі ў дварах паступова заменяць еўракантэйнеры - для паасобнага збору. Як сталіца пераходзіць да безадходнай вытворчасці - раскажа Ян Пашкевіч.
Больш за тысячу тон другаснай сыравіны за дзесяць месяцаў - нарыхтоўшчык Святлана Беразоўская ідзе на чарговы асабісты рэкорд. За 7 гадоў яе пункт прыёму вырас у адзін з самых буйных у Мінску.
Пакуль у Мінску – дзвесце прыёмных пунктаў, вясной дадаткова з’явіцца яшчэ семдзесят. Бутэлькі, часопісы, акумулятары сюды прыносяць жыхары сталіцы і нядрэнна на гэтым зарабляюць. У прыёмных пунктах сыравіну сартуюць і адпраўляюць на перапрацоўку.
Да паасобнага збору смецця мінчане пакрыху прызвычайваюцца. Добрасумленным прапануюць адразу сартаваць пластык, шкло і паперу і выкідваць у адпаведны кантэйнер. Для гэтага ў дварах устанаўліваюць спецыяльныя скрыні. Хутка іх колькасць дасягне амаль 2 тысяч.
Еўракантэйнеры маюць невялікія адтуліны для бутэлек, а зверху яны шчыльна зачыненыя, каб у жыхароў двара не было спакусы пакінуць у кантэйнеры для шкла або пластыку вялікія пакеты са смеццем.
Тэрмін службы такіх ацынкаваных кантэйнераў удвая большы за звычайныя. Старыя ж сметнікі хутка самі стануць другаснай сыравінай.
