З календаром не паспрачаешся, і 1 снежня нагадвае вадзіцелям, што з гэтага часу трэба ездзіць толькі на зімовай гуме. Пры нізкіх тэмпературах летняя становіцца небяспечнай для ўсіх удзельнікаў руху. Той, хто не паспеў пераабуць аўто па сезоне, атрымае штраф. А супрацоўнікі ДАІ разам з вадзіцелямі-асамі вырашылі на дзень адкрыць акадэмію бяспечнай зімовай язды.
Ян Пашкевіч пра тое, як захаваць кантроль над аўто ў экстрэмальнай сітуацыі.
Тэст на адказнасць гэты вадзіцель прайшоў - змяніць колы аўто па надвор'і паспеў загадзя. Снежны напамін аб блізкай зіме надвор'е рабіла неаднаразова. Але такія намёкі зразумелі не ўсе вадзіцелі.
У маразы летняя гума цвярдзее і амаль не чапляецца за асфальт. Рэзкі паварот або нават тармажэнне на святлафоры - любы манеўр на такіх "каньках" можа скончыцца ДТЗ.
Перайсці на зімовы рэжым кіравання аўто няпроста і самім вадзіцелям. Майстэрства рэагаваць на экстрэмальныя сітуацыі за рулём вадзіцеляў вучылі супрацоўнікі ДАІ разам з прафесійнымі інструктарамі.
Тут жа вадзіцелі-аматары вывучаюць і жорсткія ўрокі выжывання ад "Хаўера": да кожнай загараднай паездкі ў маразы трэба падрыхтаваць не толькі аўтамабіль.
Такім чынам зімовыя падарожжы стануць больш бяспечнымі для вадзіцеляў і іх пасажыраў. Летні ж абутак на аўтамабілі можна будзе вярнуць толькі у сакавіку.