Гэта не амбіцыйная заява, а самая сапраўдная практыка, якой ужо паўтара года прытрымліваецца адзін з райцэнтраў краіны. Дзякуючы перадабортным кансультацыям (а прасцей - псіхалагічнай дапамозе) за гэты час у Лагойску ўдалося захаваць 13 жыццяў. А такія шчаслівыя выпадкі па краіне і зусім можна перавесці ў тысячы. Магчымасць у будучай маці атрымаць тую самую псіхалагічную падтрымку і зрабіць правільны выбар з'явілася тры гады таму пасля паправак у закон аб ахове здароўя. Як некалькі слоў часам мяняюць жыццё цэлай сям'і - рэпартаж Таццяны Кароль.
Такія простыя фразы, гавораць урачы, дапамагаюць жанчыне адчуць новае жыццё ўнутры сябе і назваць яго жаданым. Перадабортныя кансультацыі ў цэнтральнай бальніцы Лагойска праводзяць для тых, хто ў сілу розных акалічнасцяў хоча спыніць цяжарнасць. Але часта такое жаданне не ўзважанае. Маленькая зарплата, адсутнасць жылля або проста "мы не планавалі" штурхаюць на неабдуманы крок, аб якім па статыстыцы амаль 80% жанчын потым шкадуюць.
Алена Бодан, начальнік галоўнага ўпраўлення арганізацыі медыцынскай дапамогі Міністэрства аховы здароўя Беларусі:
"Мы павінны выхаваць пакаленне, якое будзе радавацца любому народжанаму дзіцяці. Гэта павінна быць сацыяльнае і духоўнае запатрабаванне ў жанчыны і ў маладой сям'і мець дзяцей. Мы павінны памяняць нашы ўстаноўкі і павінны ўспрымаць сёння нашу беларускую сям'ю як сям'ю з трыма і больш дзецьмі".
І сем'яў, дзе слова "мама" гучыць ад трох малых, у нашай краіне з кожным годам усё больш. Гэта ў тым ліку вынік дзяржпадтрымкі: сацыяльныя гарантыі, льготнае крэдытаванне, дапамога на месцах. А тры гады таму ўнеслі папраўкі ў закон аб ахове здароўя. З таго часу ўрач мае права адмовіцца перарываць цяжарнасць. "Горад без абортаў". Лозунг, ідэя (можна называць па-рознаму), але гэтыя словы пацвярджаюць дзеяннямі медыкі Лагойскага раёна. Сумесна з праваслаўнай царквой яны праводзяць кансультацыі для цяжарных. І вынік ужо можна падлічыць.
Медыкі Лагойскага раёна першыя ў краіне пасля паправак у закон аб штучным перапыненні цяжарнасці прынялі рашэнне адмовіцца ад абортаў не па медыцынскіх паказчыках. Крок смелы, за паўтара года перадабортных кансультацый толькі ў гэтай бальніцы 13 жанчын захавалі жыццё свайму будучаму дзіцяці.
У краіне толькі за першае паўгоддзе дзякуючы своечасовай псіхалагічнай дапамозе на свет з'явіліся больш за тысячу немаўлят. А іх мамы, калі ўзялі на рукі сваіх першынцаў і не толькі, ужо і забыліся, што цяжарнасць была нежаданай. Ды і самі ўрачы не без эмоцый ацэньваюць такі вопыт.
Алена Зялёнка, зараз ужо шчаслівая мама Уладзіка, гаворыць, што ўрачам, якія ў літаральным сэнсе адгаварылі ад аборту, дзякаваць будзе ўсё жыццё. Прызнацца на ўсю краіну, што хацела перапыніць цяжарнасць, няпроста, але спадзяецца, што ўчынак дапаможа іншым прыняць правільнае рашэнне. Бо матэрыяльныя каштоўнасці адыходзяць на другі план, калі пасля дзевяці месяцаў адчуванняў другога сэрцабіцця бярэш на рукі часцічку сябе.
Пра тое, каб забараніць аборты цалкам, вядома, размова не ідзе, бо па стандартах Сусветнай арганізацыі аховы здароўя ды і міжнародным праве чалавека ў жанчыны павінен быць выбар - стаць маці ці не. А вось практыка не рабіць аборты без медыцынскіх паказанняў ёсць у многіх краінах свету. Напрыклад, у Германіі і Бельгіі для перапынення цяжарнасці павінны быць сапраўды важкія прычыны. Важна тое, што ў Беларусі выбар зараз ёсць і ў медыкаў. Дастаткова пісьмовай заявы ад урача на імя кіраўніка бальніцы аб такой адмове. І гэта, бадай, той выпадак, калі адзін аркуш паперы можа захоўваць сотні жыццяў.
