Спецыяльна для тых, хто вандруе на колах, Нацыянальнае агенцтва па турызме прапануе дапоўніць спіс турыстычных знакаў. Больш за дзясятак новых паказальнікаў дазволіць караванерам лепш зарыентавацца ў тым, якія ж паслугі даступныя ў беларускіх кемпінгах. Сярод рэкамендацый па развіцці гэтага напрамку ў нашай краіне - стварэнне афіцыйных сайтаў і размяшчэнне на інтэрактыўных картах еўрапейскіх пошукавых сістэм кемпінгаў. На стандарты і вопыт якіх краін абапіраліся пры падрыхтоўцы дакумента, а таксама як могуць выглядаць новыя знакі?
Матэрыял Наталлі Тарасюк. Поўнае ўяўленне пра ўсе паслугі кемпінга змогуць даць новыя паказальнікі. Распрацаваць і выкарыстаць 12 дадатковых турыстычных знакаў прапануе Нацыянальнае агенцтва па турызме.
Новы знак - "Аўтакемпінг" - паслужыць сігналам: у гэтым месцы турыст можа прыпаркаваць свой дом на колах. Пра тое, ці ёсць Wi-Fi, электрычнасць або санітарная станцыя, аўтатурыст таксама даведаецца па шыльдзе.
Менавіта адпачынак у кемпінгах і караванінг, згодна з падлікамі, выбіраюць 23% усіх еўрапейцаў. У Беларусі пакуль зарэгістравана толькі крыху больш за паўтысячы дач-прычэпаў.
Новыя знакі і паслугі дазволяць не толькі развіваць унутраны аўтатурызм, але і затрымацца даўжэй замежным караванерам.
Асновай для распрацоўкі новых знакаў паслужылі стандарты ЗША, у прыватнасці, штата Каларада, а таксама еўрапейскі стандарт якасці для кемпінгаў і сістэма зорнасці, распрацаваная аўтамабілістамі Германіі.
Пакуль у Беларусі менш як 20 кемпінгаў. Аднак да канца года іх можа стаць як мінімум удвая больш. Спецыялісты раяць уздоўж загружаных трас (а гэта, у першую чаргу, вядомая "алімпійка" - Брэсцкая траса і Гродзенская) развіваць транзітны кемпінг. Цікавы турыстам стане і кластарны кемпінг - размяшчэнне аб'ектаў паблізу славутасцяў і помнікаў архітэктуры.
Музейная экспазіцыя побач з кемпінгам ужо зараз прыемны бонус для падарожнікаў. Замежны аўтатурыст зможа не толькі вырашыць бытавыя пытанні, але і больш даведацца пра культуру нашай краіны.
Актыўна заяўляць аб сабе ў Глабальнай сетцы ўладальнікам кемпінгаў раяць і ў Нацыянальным агенцтве па турызме. Караванер з большай верагоднасцю выбера кемпінг, поўную інфармацыю пра які можна даведацца ў Інтэрнэце ўсяго за некалькі клікаў. Эфектыўным будзе і размяшчэнне на інтэрактыўных картах еўрапейскіх пошукавых сістэм кемпінгаў, што аб'ядноўваюць тысячы аб'ектаў па ўсёй Еўропе.
