Да канца года будаўнікі паспеюць здаць яшчэ прыкладна 200 тысяч квадратаў. Новыя дамы будуюцца ва ўсіх раёнах. Асабліва перспектыўным лічыцца Мінскі, а таксама Смалявіцкі, Дзяржынскі і Пухавіцкі. І вось у апошнім сёння ўрачыстасці - 60 сямей атрымалі ключы ад уласных кватэр.
Навасельцаў павіншавала Антаніна Станкевіч. Прывезці свайго гадаванца ў голыя сцены сям’я Захарчук не адважылася. Аднак традыцыі трэба выконваць, а таму кот - роставая лялька - сёння ў навасельцаў нарасхват. Людзі і не ўтойваюць эмоцый - для сямей з Мар’інай Горкі канец тыдня стаў па-сапраўднаму святочным.
Будучыя суседзі – сям’я супрацоўнікаў МНС - пачынаюць экскурсію па новым жыллі з дзіцячай пляцоўкі. Карусель “Рамонак” вельмі падабаецца дачцэ Лізе. Ды і з новымі сябрамі праблем ніякіх не будзе, мяркуючы па колькасці дзяцей побач.
Новы дом пабудавалі ўсяго за год. Шчаслівыя навасельцы – сем’і супрацоўнікаў МНС, МУС, а таксама работнікаў сферы культуры.
На чарзе ў Пухавіцкім раёне – яшчэ 4 ўрачыстыя адкрыцці. Да канца года ключы ад новых кватэр атрымаюць удзельнікі жыллёва-будаўнічых кааператываў. У пасёлку Дружны будаўнікі ўжо на стадыі добраўпарадкавання. Ды і надвор’е работам спрыяе.
Будаўнічая галіна вобласці з планам спраўляецца, хоць і без замінак не абыходзіцца. Да гэтай пары два дамы - з перавышэннем нарматыўных тэрмінаў здачы з-за недахопу фінансавання. Але ў наступным сезоне за іх возьмуцца ў першую чаргу.
У наступным годзе пабудуюць таксама амаль мільён квадратных метраў жылля. У першую чаргу ўлічаць інтарэсы шматдзетных сем’яў, бюджэтнікаў і тых, хто пражывае ў вёсцы.
