Чацвёрты, перадапошні, узровень небяспекі аб'яўлены ў лясах на большай частцы Брэсцкай, Гомельскай і Магілёўскай абласцей. Гэта азначае, што ў іх уводзіцца забарона на наведванне. Прычым, не толькі для беларусаў, але і для жыхароў прымежных украінскіх вёсак. Леснікі штодня патрулююць лясныя масівы. За парушэнне забароны прадугледжаны штраф да 5 мільёнаў рублёў.
Вольга Халадовіч прадоўжыць тэму.
Далей ужо нельга. Гарачае лета і 4-ы клас пажарнай небяспекі. У некалькіх раёнах Гомельскай вобласці лясы пад забаронай. Штраф за парушэнне можа дасягаць 5 мільёнаў рублёў.
9 з 10 лясных пажараў адбываюцца па віне чалавека. Гэта і кінуты недакурак, і непатушанае вогнішча. Пры моцным ветры агонь распаўсюджваецца з хуткасцю 30 кіламетраў за гадзіну. Таму лясная ахова перайшла на ўзмоцнены рэжым працы.
Нават калі нічога не гарыць, служба дзяржаўнай лясной аховы патрулюе лясныя масівы. Тэхніка і сродкі пажаратушэння правяраюцца штодня.
Аляксандр Семанкоў, начальнік пажарна-хімічнай станцыі №2 Гомельскага лясгаса: Камплектацыя выкананая ў два разы. Закупленае новае абсталяванне як айчыннай, так і імпартнай вытворчасці. Існуюць пажарныя вышкі назірання, якія ўкамплектаваныя відэакамерамі. Зразумела, пажарныя аўтамабілі і ўсё неабходнае абсталяванне для таго, каб аператыўна выехаць і лакалізаваць ачаг узгарання.
Электронны дазор працуе кругласутачна. У Гомельскай вобласці на пажарных вышках усталявана больш чым паўсотня відэакамер. У выпадку задымлення яны вызначаюць каардынаты крыніцы ўзгарання. Гэта дапамагае ліквідаваць пажар максімальна хутка. І трымаць сітуацыю пад пастаянным кантролем.
Самы высокі клас пажарнай небяспекі ў лясах - пяты. Калі пажар можа ўзнікнуць, нават калі з выхлапной трубы аўтамабіля з'явіцца іскра. Сітуацыю можа змяніць толькі надвор'е - пахаладанне і дажджы. Але ў найбліжэйшыя выхадныя сіноптыкі абяцаюць сонца і плюс 25. Гэта значыць, што паходы ў лес пакуль застануцца пад забаронай.
