Лічаныя дні застаюцца да Новага года - часу, калі здзяйсняюцца цуды. Вось такім цудам для амаль дзвюх з паловай тысяч хлопчыкаў і дзяўчынак з усёй Беларусі напярэдадні стала Галоўная ёлка краіны. У сталіцу прыехалі выдатнікі вучобы, адораныя дзеці, хлопчыкі і дзяўчынкі з малазабяспечаных, шматдзетных сем'яў і тыя, хто застаўся без бацькоўскай увагі. Ім асабліва трэба адчуваць клопат і цяпло дарослых. У гэтым і сэнс самай кранальнай дабрачыннай акцыі "Нашы дзеці". Яна ўжо чвэрць стагоддзя радуе дзятву ўсёй краіны. Для маленькіх гасцей падрыхтавалі атмасферную праграму з конкурсамі, віктарынамі, казачнымі персанажамі.
Яркім момантам свята стаў паказ "Чароўны свет" і, зразумела, віншаванне кіраўніка дзяржавы. Прыбыццё прэзідэнта дзеці чакалі з хваляваннем, таму не ўпусцілі моманту, каб сфатаграфаваць Аляксандра Лукашэнку на свае смартфоны. Дарэчы, менавіта па ініцыятыве кіраўніка дзяржавы ў Беларусі стала традыцыяй пераднавагоднімі днямі ўсёй краінай уключацца ў марафон добрых спраў, бо свята без падарункаў не бывае.
І проста так галоўнага героя свайго свята дзеці не адпусцілі. Яны ўручылі кіраўніку дзяржавы падарунак: плеценую з лазы шкатулку з навагоднімі шарамі, выкананымі ў аўтарскай тэхніцы, і пано "Навагодняя ноч". А тыя, хто пасмялей, нават паспелі зрабіць сэлфі з прэзідэнтам.
Аляксандр Лукашэнка паклапаціўся, каб у кожнага юнага госця свята быў салодкі падарунак - гэта як прыемны бонус да яркіх уражанняў. Гэта не фінал святочнай акцыі "Нашы дзеці", яна прадоўжыцца да 10 студзеня. На гэты раз марафон дабра ахопіць больш за 15 тысяч хлопчыкаў і дзяўчынак з усіх куткоў краіны.
